(*** වතුපිටිවල එස්.යූ.ඩබ්ලිව්.කේ. ජයවර්ධන)

මහ මැතිවරණයේදී එක්සත් ජාතික පාක්ෂිකයින් වශයෙන් අප රටේ නව රජය පිහිටුවීමට කටයුතු කරනවා. එක්සත් ජාතික පක්ෂයෙන් කඩාගෙන ගිය පිරිස මේ මැතිවරණයේදී ‘‘බිල්ඩිමක්’’ අල්ලන්න සූදානම් වෙනවා යැයි ආරක්ෂක රාජ්‍ය  හිටපු අමාත්‍ය සහ මහ මැතිවරණයට එක්සත් ජාතික පක්ෂයෙන් ගම්පහ දිස්ත්‍රික්කයට තරග වදින කැලණිය එජාප ප්‍රධාන සංවිධායක රුවන් විජයවර්ධන මහතා අත්තනගල්ලේදී පැවැසීය.

අත්තනගල්ල මැතිවරණ බල ප්‍රදේශයේ කැන්දලන්දවත්ත, වෙලගෙදර, කත්තොට, බෝපැත්ත, කඹුරුගල්ල, පල්කුඹුර, රන්පොකුණගම යන ගම් හතෙහි මේ රැස්වීම පැවැත්විණි.

රැස්වීම් ඇමැතීමට පෙර ඓතිහාසික අත්තනගල්ල රාජමහා විහාරස්ථානයට ගිය අපේක්ෂක රුවන් විජයවර්ධන මහතා අත්තනගල්ල ඉහළ පන්සලේ විහාරාධිපති ආචාර්ය පන්නිල ශ්‍රී ආනන්ද නා හිමිපාණන් සහ අත්තනගල්ල පහළ පන්සලේ විහාරාධිපති පින්නවල සෝමානන්ද හිමි බැහැදැක නා හිමිවරුන් විෂයෙහි අටපිරිකර පූජා කර මහා සංඝරත්නයේ ආශිර්වාද ගත්තේය.

අනතුරුව රැස්වීම් ඇමතූ රුවන් විජයවර්ධන මහතා මෙසේද පැවසීය.

මහ මැතිවරණයේදී එක්සත් ජාතික පාක්ෂිකයින් වශයෙන් අප  රටේ නව රජය පිහිටුවීමට කටයුතු කරනවා. නමුත් එක්සත් ජාතික පක්ෂය කඩාගෙන ගිය පිරිස මේ මැතිවරණයේදී ‘බිල්ඩිමක්’ අල්ලන්න සූදානම් වෙනවා.

කලබලකාරීන් පිරිස අපේ පක්ෂය දෙකට කඩලා. නියම එක්සත් ජාතික පාක්ෂිකයින් සිටින්නේ අප සමගයි.

මහාමාන්‍ය ඩී.එස්. සේනානායක, ඩඩ්ලි සේනානායක, ශ්‍රීමත් ජෝන්කොතලාවල, ජේ.ආර්. ජයවර්ධන, ආර්. ප්‍රේමදාස යන එක්සත් ජාතික පක්ෂයේ සිටි නායකයින් දිවිහිමියෙන් පක්ෂය ආරක්ෂා කළා. පක්ෂය රැකබලා ගත්තා. එක්සත් ජාතික පක්ෂ වත්මන් නායක රනිල් වික්‍රමසිංහ මහතා ද ඒ අනුව කටයුතු කරනවා.

එක්සත් ජාතික පක්ෂ​ෙයන් මෑතකදී කඩාගෙන ගිය කණ්ඩායම කියාගෙන යනවා ‘‘සිරිකොත’’ අල්ලනවාලු. නමුත් අප කටයුතු කරන්නේ රටේ නව රජය පිහිටුවීමටයි. අතීතයේදීත්  එක්සත් ජාතික පක්ෂයේ කිහිප දෙනකු පක්ෂය කඩාගෙන ගියා. ඒ ගිය බොහෝ දෙනකු නැවත එක්සත් ජාතික පක්ෂයට පැමිණියා.

දැන් එක්සත් ජාතික පක්ෂ ප්‍රබලයෝ නැහැ කියනවා. ප්‍රබලයෝ හදන්නේ එක්සත් ජාතික පක්ෂයයි. එක්සත් ජාතික පක්ෂයෙන් පෝෂණය වෙලා, එක්සත් ජාතික පක්ෂයට අපහාස කරන එක ගැන මා කනගාටු වෙනවා. පක්ෂය කඩාගෙන ගිය පිරිස අනාගතයේදී එක්සත් ජාතික පක්ෂයට එනවා.

අප ඉදිරියේදී සියලු ජනකොටස් එකතු කරගෙන රටේ නව රජය පිහිටුවනවා.

අත්තනගල්ල නගරයේ නව වෙළෙසලක් විවෘත කිරීම ද රුවන් විජයවර්ධන මහතා  විසින් මෙදින කරන ලදී.
‘ජනහමු’ සඳහා මහමැතිවරණයේදී එක්සත් ජාතික පක්ෂයෙන් ගම්පහ දිස්ත්‍රික්කයට තරග කරන තුෂාරි ප්‍රියංගා, අසිත මාන්නප්පෙරුම, අත්තනගල්ල එජාප බලමණ්ඩලයේ ප්‍රධාන ලේකම් හොරගොල්ලාගම ලෙස්ලි ලක්ෂ්මන්, රුවන් විජයවර්ධන මහතාගේ අත්තනගල්ල කොට්ඨාසයේ සම්බන්ධීකරණ ලේකම්වරුන් වන  මනෝජ් ප්‍රියදර්ශන, සුමිත් රණසිංහ, අත්තනගල්ල එජාප ප්‍රචාරක ලේකම් ධර්මරත්න ජයකොඩි යන මහත්ම මහත්මීහු ප්‍රමුඛ පිරිස සහභාගි වූහ.