(ශ්‍යාමන් ජයසිංහ )

 කොට්ටාව නගර මධ්‍යයේදී අද  (03)  සිමෙන්ති තොගයක්  පැටවූ ලොරියක් පෙරළී සිදු වූ අනතුරකින් දැඩි රථවාහන තදබදයක් ඇතිි විය.

සිමෙන්ති කොට්ට 450 ක් පටවා ගත් ලොරිය  මත්තේගොඩ  ප්‍රදේශයේ සිට පැමිණ හෝමාගම දෙසට හැරවීම සඳහා හයිලෙවල්  ප්‍රධාන මාර්ගයට යොමු කිරීමේදී  මාර්ගය මැද පෙරළී ඇතැයි පොලිසිය කියයි.

සිදුවූ අනතුරින් කිසිවකුටත් තුවාල සිදුවී නැතිි අතර ලොරිය පෙරළීමත් සමග එහි තිබූ සිමෙන්ති කොට්ට මාර්ගය පුරා සීසීකඩ විසිරී  යන්නට වූ බව පොලිසිය කියයි.

එම ස්ථානයට පැමිණි කොට්ටාව පොලිසියේ ස්ථානාධිපති රොෂාන්ද සොයිසා මහතා ප්‍රමුඛ රථ වාහන අංශයේ නිලධාරීන්  සිමෙන්ති ලොරියේ රියදුරු සමග සාකච්ඡා කර වෙනත් ලොරියක්  එම ස්ථානයට ගෙන්වා  කඩිනමින්  මාර්ගය පුරා වැටී තිබූ සිමෙන්ති කොට්ට එම රථයට පටවා

පැය කිහිපයක් පුරා හයිලෙවල්  මාර්ගයේ තිබූ වාහන තදබදය අවම කිරීමට පියවර ගැනීමට කටයුතු කළහ

ලොරිය දකුණු පසට හැරවීමේදී  එහි තිබූ සිමෙන්ති තොගය බරවීම හේතුවෙන් මෙම අනතුර වන්නට ඇතැයි පොලිසිය සැක කරයි.