“සෝජාන් වගා ක්‍රමය” ශ්‍රී ලංකාවට

(විනීතා එම් ගමගේ)

ඉන්දුනිසියානු සාම්ප්‍රදායික වගා ක්‍රමයක් වන “සෝජාන් වගා ක්‍රමය” ශ්‍රී ලංකාවට හඳුන්වා දීමට පරිසර අමාත්‍යංශය පියවර ගෙන ඇත. 

ලවණ ජලය සහිත ඉඩම්, වගුරු බිම්, මෙන්ම ජලය විධිමත් පරිදි බැස නොයන වගා කළ හැකි එහෙත් දැනට පුරන් වීමට ඉඩ හැර තිබෙන කුඹුරු ඉඩම් ආශ්‍රිතව පලදායීව වගා කිරීම සඳහා සෝජාන් වගා ක්‍රමය උපයෝගී කරගන්නා අතර එවැනි ඉඩම්වල තරමක් උස පස් වැටි සකසා ඒ මත ආහාර භෝග වගා කිරීම සිදු කෙරේ.

මෙම ක්‍රමය යටතේ නව වගා ව්‍යාපෘති 05ක් මෙම වසර තුළ හඳුන්වා දීමට පරිසර අමාත්‍යංශය කටයුතු යොදා ඇතැයි පරිසර අමාත්‍ය මහින්ද අමරවීර මහතා  ලංකාදීපයට පැවැසීය. 

මේ වනවිට කෘෂිකාර්මික කටයුතු සඳහා යොදා ගත නොහැකි පුරන් කුඹුරු අක්කර 20,917ක් රට තුළ පවතින බවත් වගා කළ හැකි පුරන් කුඹුරු අක්කර 46,325 ක් ඇති බවත් කී ඔහු වගා කළ නොහැකි පුරන් කුඹුරුවලින් වැඩි ප්‍රමාණයක් වන අක්කර 5903 ක් පවතින්නේ බස්නාහිර පළාතේ යැයි ද කීය. 

එමෙන්ම වගා කළ හැකි පුරන් කුඹුරුවලින් සියයට 50කට ආසන්න ප්‍රමාණයක් ඇත්තේ බස්නාහිර පළාතේ බවත්, එය අක්කර 18,461.35ක් වන බවත් ගොවිජන සේවා දෙපාර්තමේන්තු සංඛයා ලේඛන පෙන්වා දෙන්නේ යැයි ද අමාත්‍යවරයා සඳහන් කළේය.