(ඩයනා උදයංගනී)

ශ්‍රී ලංකා නිදහස් පක්‍ෂයේ මන්ත්‍රීවරුන් කිහිපදෙනකු රාජ්‍ය අමාත්‍යධූර ලබාගෙන ඇත්තේ පක්ෂයේ කිසිදු අනුමැතියකින් තොරව බවත්, ඔවුන් පක්‍ෂ ස්ථාවරයට පටහැනිව තම තමන්ගේ පෞද්ගලික ලාභ අපේක්ෂා පෙරදැරිව මෙම අමාත්‍යධූර ලබාගැනීම පිළිබඳ කනගාටුව ප්‍රකාශ කරන බවත්, එහි සභාපති, හිටපු ජනාධිපති මෛත්‍රීපාල සිරිසේන මහතා පවසයි.

සර්ව පාක්ෂික අන්තර් කාලීන ආණ්ඩුවක් ස්ථාපනය වන්නේ නම් පමණක් ආණ්ඩුවේ තනතුරු භාරගෙන සහය ලබාදීමට ශ්‍රී ලංකා නිදහස් පක්ෂයේ මධ්‍යම කාරක සභාව තීරණයක් ගෙන ඇති බවත්, එය පසුගිය දා පැවති පක්ෂ 71 වන මහා සම්මේලනයේදී, පක්ෂයේ සමස්ත ලංකා කාරක සභාව සහ විධායක සභාව ඒකමතිකව අනුමත කර ඇති බවත් සභාපතිවරයා සඳහන් කරයි.

පක්‍ෂයේ මන්ත්‍රීවරුන් කිහිපදෙනෙකු රාජ්‍ය අමාත්‍යධූර ලබාගැනීම සම්බන්ධයෙන් නිවේදනයක් නිකුත් කරමින් මෛත්‍රීපාල සිරිසේන මහතා මේ බව සඳහන් කර තිබේ.

ශ්‍රී ලංකා නිදහස් පක්ෂය සමග කිසිඳු එකඟතාවකින් තොරව අත්තනෝමතිකව මන්ත්‍රීවරුන්ට තනතුරු පිරිනැමීමෙන් පෙනී යන්නේ අප යෝජනා කළ පරිදි සර්ව පාක්ෂික අන්තර් කාලීන ආණ්ඩුවක් ස්ථාපනයට ආණ්ඩුව තුළ සැබෑ වුවමනාවක් නොමැති බව යැයි පවසන හිටපු ජනාධිපතිවරයා ඒ නිසා යළිත් බිහිවන්නේ ජනතාව විසින් ප්‍රතික්ෂේප කළ බලලෝභී සාම්ප්‍රදායික ආණ්ඩුවක් පමණක් යැයි ද සඳහන් කර තිබේ.

සර්ව පාක්ෂික අන්තර් කාලීන ආණ්ඩුවක් සඳහා සාකච්ඡා පැවැත්වෙන අතරතුර, පක්ෂය හෝ පක්ෂ නායකත්වය සමඟ කිසිදු සාකච්ඡාවකින් තොරව, ශ්‍රී ලංකා නිදහස් පක්ෂයද වත්මන් ආණ්ඩුවේ තනතුරු දරමින් සහය දෙන බව පොදු මහජනතාවට ව්‍යාජව ඇඟවීම සඳහා මන්ත්‍රීවරුන් කිහිප දෙනෙකුට අමාත්‍ය තනතුරු පිරිනැමීමේ රජයේ ස්ථාවරය සම්බන්ධයෙන්ද පක්‍ෂයේ කනගාටුව පළ කරන බව හිටපු ජනාධිපතිවරයා කියා සිටී.

එය, මහ නාහිමිපාණන් වහන්සේලා ඇතුළු ආගමික පූජකතුමන්, විද්වත් හා වෘත්තිකයන්, සිවිල් සමාජ ක්‍රීයාකාරින් ඇතුලු පොදු මහජනතාවගේ මතය නිර්දය ලෙස බැහැර කිරීමක් මෙන්ම රටේ උද්ගත ආර්ථික අර්බුදය සමනය කිරීම සඳහා පිණිස සහයදීමට අපේක්ෂාවෙන් දේශපාලන ස්ථාවරත්වය ප්‍රාර්ථනා කරන ජාත්‍යන්තර ප්‍රජාවේ බලාපොරොත්තු නොසලකා හැරීමක් බව ද එම නිවේදනයේ සඳහන් වේ.

එමෙන්ම ශ්‍රී ලංකා නිදහස් පක්ෂයේ මන්ත්‍රීවරුන් පිරිසක් පක්ෂයේ අනුමැතියකින් තොරව අත්තනෝමතික ලෙස අමාත්‍යධූර භාරගැනීම මාතෘභූමිය වෙනුවෙන් හා ජනතාවගේ උන්නතිය උදෙසා පක්‍ෂය ගෙන යන අනාගත දේශපාලන වැඩපිළිවලේ ජයග්‍රහණ සඳහා කිසිසේත්ම බලනොපාන බව තරයේ අවධාරණය කරන බව හිටපු ජනාධිපතිවරයා පවසයි.