(විමුක්ති එස් රුද්‍රිගු)

ලොව දෙවැනි ස්ථානයට විශාලතම දියමන්තිය බොට්ස්වානා රාජ්‍යයෙන් පතලකින් හමුවූ බව කැනේඩියානු දියමන්ති සමාගමක් වන ලුකාරා නිවේදනයක් නිකුත් කරමින් ප්‍රකාශ කළේය. කැරට් 2492 ක් වන මෙම දියමන්තිය බොට්ස්වානා රාජ්‍යයෙන් හමුවූ විශාලතම දියමන්තියද වන බව එම සමාගම පැවැසුවේය.

මෙම දියමන්තිය එක්ස්-රේ තාක්ෂණය භාවිත කරමින් මෙම දියමන්තිය සොයාගත් බවත් ඊසානදිග බොට්ස්වානා පළාතේ කරෝවේ දියමන්ති පත්ලෙන් දියමන්තිය හමුවූ බවත් ලුකාරා දියමන්ති සමාගම ප්‍රකාශ කළේය. ලුකාරා සමාගම මෙම දියමන්තියට වටිනාකමක් ලබාදී නොමැති අතර මෙම දියමන්තිය දෙවැනි වන්නේ 1905 වසරේ සොයාගත් කැරට් 3016 ක්වූ කලිනන් දියමන්තියට පමණක් බව එම සමාගම පැවැසුවේය.

කෙසේ නමුත් මෙම දියමන්තිය ආසන්න වශයෙන් ඇමෙරිකානු ඩොලර් මිලියන 40 ක් (ශ්‍රී ලංකා රුපියල් කෝටි 1207 ක් පමණ) පමණ වන බව දියමන්තිකරුවන් ඇස්තමේන්තු කර තිබේ.

ලුකාරා දියමන්ති සමාගම මෙම දියමන්තිය ඊයේ (22) දින බොට්ස්වානා ජනාධිපති මොක්ග්විට්සි මසීසිට පෙන්වා ඇති අතර බොට්ස්වානා රජය එම දියමන්තිය ලොව දෙවැනි ස්ථානයට විශාලතම දියමන්තිය බව පිළිගෙන ඇත.