(සුජිත් හේවාජුලිගේ සහ  අංජුල මහික වීරරත්න)

රටට පණ කඳ ඇති අගමැතිවරයකු අවශ්‍ය වන බව අපේ ජන බල පක්ෂයේ  පත් කළ මන්ත්‍රී අතුරලියේ රතන හිමියෝ පාර්ලිමේන්තුවේදී අද (6) පැවසූහ.

උන්වහන්සේ මෙසේ පැවසූවේ  රටේ පවතින තත්වය සම්බන්ධයෙන් පැවැති විවාදයේදීය.

පණ කඳ තිබෙන හයිය හත්තිය තියෙන අගමැතිවරයකු පත් කළ යුතු බවත් ඔහු  පාර්ලිමේන්තුවේ රැඳී සිටිය යුතු බවත් උන්වහන්සේ කීහ. ඒ හැර වෙනත් විකල්පයක් නැතැයිද  රතන හිමියෝ පැවසූහ.

අලුත් අගමැතිවරයකු සහ  කැබිනට් මණ්ඩලයක් පත්කර ගෙන රට ඉදිරියට ගෙන යා යුතු බවද  උන්වහන්සේ සඳහන් කළහ. අතුරලිය රතන හිමියෝ මෙසේද පැවසූහ.

අප සාකච්ඡාවෙන් සම්මුතියෙන් එකඟතාවයකට පැමිණිය යුතුයි.ඊට විපක්ෂයද දායක විය යුතුයි. ආණ්ඩුවේ සහ විපක්ෂයේ කොටස් සමග කැබිනට් මණ්ඩලයක් පත් කරන්න පුළුවන්.මේ ආණ්ඩුවට දිගු කලක් යන්න බැහැ. ඒක තමයි ඇත්ත තත්වය.