(සුජිත් හේවාජුලිගේ)

බරපතළ වැඩ සහිතව සිර දඬුවම් නියම කෙරුණු මහින්දානන්ද අලුත්ගමගේ සහ නලින් ප්‍රනාන්දු හිටපු අමාත්‍යවරුන් බොහෝ දුරට බන්ධනාගාරයේ   මුද්‍රණ අංශයේ සේවයේ යෙදවෙනු ඇතැයි බන්ධනාගාර ආරංචි මාර්ගවලින් දැනගන්නට ඇත.

වැලිකඩ බන්ධනාගාරයේ අධිකාරිවරයා විසින් අද හෙටම එම වැඩ පැවරීම  කෙරෙනු ඇත.

මේ අතර දඬුවම් නියම වුණු  සිරකරුවන්ට නිකුත් කෙරෙන  ජම්පරය නමැති ඇඳුම හිටපු අමාත්‍යවරුන් දෙදෙනාට ඊයේ (29) ලබා දුන් බව බන්ධනාගාර කොමසාරිස් ගාමිණි දිසානායක මහතා පැවසීය.

එසේම  දෙදෙනා බන්ධනාගාර වෛද්‍යවරයාට   පෙරේදා යොමු කළ බවද ඔහු සඳහන් කළේය.

2015 ජනාධිපතිවරණ සමයේ දී කැරම් බෝඩ් 14000ක් සහ  දාම් බෝඩ් 11000ක්  නීති විරෝධී ලෙස ක්‍රීඩා සංගම් අතර  බෙදා හැරීමෙන් රුපියල් කෝටි පහකට වැඩි පාඩුවක් කිරීමේ චෝදනාව යටතේ හිටපු අමාත්‍ය මහින්දානන්ද අලුත්ගමගේ මහතාට බරපතළ වැඩ සහිතව  වසර 20ක සිර දඬුවමක්ද සතොස  හිටපු සභාපති නලින් ප්‍රනාන්දු මහතාට බරපතළ  වැඩ සහිතව  වසර 25ක සිර දඬුවමක්ද ත්‍රිපුද්ගල මහාධිකරණ විනිසුරු මඩුල්ල විසින්  ඊයේ (29) නියම කරනු ලැබීය.