(සුජිත් හේවාජුලිගේ සහ  අංජුල මහික වීරරත්න)

අපොස සාමාන්‍ය පෙළ විභාගයෙන් පසු දරුවන් පාසල්වලට නොඒමේ  බරපතළ ගැටලුවක් පවතින හෙයින් ඒ ගැටලුව වහා විසඳන ලෙස කුරුණෑගල දිස්ත්‍රික් මන්ත්‍රී නීතිඥ දයාසිරි ජයසේකර මහතා අධ්‍යාපන අමාත්‍යවරයාගෙන් පාර්ලිමේන්තුවේදී අද (20) ඉල්ලීමක් කළේය.

පාසල් නොයන දරුවන් අන්තිමේදී විභාගවලට ලියන්න දෙන්න කියලා
විදුහල්පතිවරුන් කන්න හදනවා යැයිද ඔහු සඳහන් කළේය.

ජයසේකර මහතා මෙම ඉල්ලීම කළේ සභාවේ  කටයුතු ආරම්භයේදී ප්‍රකාශයක් කරමිනි.

දයාසිරි ජයසේකර මහතා මෙසේද පැවසීය.

මේක අද හැම පාසලකම තියෙන තත්වයක්. අපොස සාමාන්‍ය පෙළ විභාගයෙන් පසු දරුවන් පාසල්වලට එන්නේ නැහැ. මවුපියනුත්  මේ වැඩේට  සහය දෙනවා. ඊට පස්සේ අන්තිමේදී පාසල්වලට ඇවිල්ල උසස් පෙළ ලියන්න දෙන්න කියලා ප්‍රින්සිපල්ව කන්න හදනවා. අද පැමිණීම සියයට  80ක්   නැහැ. ඔබතුමා ගොඩක් ප්‍රශ්න වලදී මැදිහත් වෙලා තියෙනවා. ලබන අවුරුද්දේ ඉඳලාවත්  මේකට පිළියමක් හදමු.

අධ්‍යාපන අමාත්‍ය ආචාර්ය  සුසිල් ප්‍රේමජයන්ත මහතා

දැන් මතුකරපු කාරණයට මම වැඩපිළිවෙලක්  සැප්තැම්බර් මස මුල  ආරම්භ කරනව. නියමු ව්‍යාපෘතියක් විදියට.සාමාන්‍ය පෙළ උසස් පෙළ අවසන් කර ඇති දරුවන්ට ප්‍රතිඵල ලැබෙන තෙක් පාසල් වලදී  මාර්ගෝපදේශන සහ වෘත්තීය අධ්‍යාපනය දීමට කටයුතු කරනවා. හැම පාසලකම ඒක ආරම්භ කරනවා.