(සුජිත් හේවාජුලිගේ )

පුපුරණ ද්‍රව්‍ය නිශ්ක්‍රීය කිරීම ඇතුළු පොලීසියේ රාජකාරි සඳහා  සුනඛ පැටවුන් ලබා ගැනීමේ  අරමණින්  උසස් වර්ගයේ  බල්ලන් සහ බැල්ලියන් 25 දෙනෙකු විදේශයෙන් මිලදී ගැනීමට ටෙන්ඩර් පත් කැඳවා ඇතැයි පොලිස් මූලස්ථානය පවසයි.

මෙම එක් සුනඛයෙකු  ලක්ෂ දහයක් පමණ වේ යැයි  පොලිස් මූලස්ථානයේ උසස් නිලධාරියෙක් ඉරිදා ලංකාදීපයට පැවැසීය.

පොලිස් නිල සුනඛ අංශයෙන් කෙරුණු ඉල්ලීමක් අනුව පොලිස් සැපයුම් සේවා කොට්ඨාසය  මෙම සුනඛයන් මිලදී ගැනීමට කටයුතු කරගෙන යයි.

ආරංචිමාර්ග සඳහන් කරන අන්දමට පොලිස් දෙපාර්තමේන්තුවට නිල සුනඛයන් සහ අශ්වයන්  2019 වර්ෂයෙන් පසු මිලදී ගෙන නොමැත .

මෙම බල්ලන් සහ බැල්ලියන් මාර්ගයෙන් පැටවුන් ලබාගෙන ඒ  සතුන් පොලීසියේ විවිධ රාජකාරි  සඳහා  පුහුණු කිරීමට බලාපොරොත්තු වන බව පොලිසිය පවසයි.