කොමර්ෂල් බැංකුව නැවත වරක් 'LMD 100' හි ඉහළම ශ්‍රේණිගත බැංකුව බවට පත් වී ඇති අතර අඛණ්ඩව 28 වැනි වරටත් මෙම කීර්තිමත් ලැයිස්තුවේ හොඳම ආයතනික දැවැන්තයන් 10 අතරට පැමිණීමට සමත්ව සිටී.

එසේම, මෙම ශ්‍රේණිගත කිරීම මුල්වරට ප්‍රකාශයට පත් කරන ලද 1993-94 වසරේ සිටම කොමර්ෂල් බැංකුව ශ්‍රී ලංකාවේ ඉහළම සමාගම් 10 අතර සිටීම විශේෂත්වයක් බව එම බැංකුව සඳහන් කරයි.

කොමර්ෂල් බැංකුව, රටේ ශක්තිමත්ම ව්‍යාපාරික ආයතනයක් ලෙස, 2020-21 සඳහා LMD 100 හි සියලු ආයතන අතරින් වත්කම් අනුව සමස්තයක් ලෙස ප්‍රථම ස්ථානය ද, ලාභය අනුව දෙවැනි ස්ථානය ද, කොටස් හිමියන්ගේ අරමුදල් අනුව දෙවැනි ස්ථානය සහ ආදායම අනුව හතරවැනි ස්ථානය අත්කර ගනිමින් බැංකුවේ ශක්තිය යළි තහවුරු කර ඇත.

කොමර්ෂල් බැංකුවල LMD ශ්‍රේණිගත කිරීම්වල ඉහළින්ම සිටීම පිළිබඳව අදහස් දක්වමින් කොමර්ෂල් බැංකුවේ කළමනාකාර අධ්‍යක්ෂ සහ සමූහ ප්‍රධාන විධායක නිලධාරී එස්. රෙන්ගනාදන් මහතා මෙසේ පැවසීය. “මූල්‍ය සේවා ක්ෂේත්‍රය තුළ අඛණ්ඩතාව ඉතා ඉහළින් අගය කෙරෙනවා. විශේෂයෙන්ම නවතම LMD ශ්‍රේණිගත කිරීම සඳහා පාදක වූ වර්ෂය වන 2020-21 කාලය තුළ මුහුණ දුන් අභියෝගාත්මක තත්ත්වය තුළ කාර්ය සාධනය පවත්වාගෙන යාම ප්‍රශංසනීයයි. මෙම ලැයිස්තුවේ ඉහළම ශ්‍රේණිගත බැංකුව ලෙස අපගේ ස්ථානය රඳවා ගැනීම කොමර්ෂල් බැංකුවේ සහ එහි කණ්ඩායමේ නිසඟ ශක්තිය අවධාරණය කරනවා.”