(නිමන්ති රණසිංහ)

තම පුතණුවන්ගේ වම් වකුගඩුව ඉවත් කිරීමේ ශල්‍ය කර්මයෙන් දකුණු වකුගඩුවද අත් වැරදීමකින් ඉවත් වී ඇති බවට වෛද්‍යවරුන් තමන්ට දැනුම් දුන් බව රිජ්වේ ආර්යා ළමා රෝහලේ දී සිදුකළ වකුගඩු සැත්කමකදී මියගිය තුන් හැවිරිදි දරුවාගේ මව සිය ප්‍රකාශයෙන් සඳහන් කර ඇතැයි බොරැල්ල පොලීසිය කොළඹ අතිරේක මහේස්ත්‍රාත් රජීන්ද්‍රා ජයසූරිය මහත්මිය ඉදිරියේ අද (31) කරුණු වාර්තා කර ඇත.

තුන් හැවිරිදි තම පුත්‍රයාගේ වම් වකුගඩුව ඉවත් කිරීමේ සැත්කමක් විශේෂඥ වෛද්‍ය නවින් විජේකෝන් මහතා විසින් ඉකුත් 2022 වසරේ දෙසැම්බර් මස 24 වැනිදා කොළඹ රිජ්වේ ආර්යා ළමා රෝහලේදී සිදුකළ බවත්, එහිදී මෙම සිද්ධිය සිදුවූ බවට එම රෝහලේ වෛද්‍යවරුන් තමා සහ තම සැමියා ගෙන්වා දැනුම් දුන් බවත් මියගිය දරුවාගේ මව වන ශ්‍රී ඥානානන්ද මාවත, කොටහේන, කොළඹ 13 පදිංචි පාතිමා රිසානා අබ්දුල් කාදර් (41) යන අය ප්‍රකාශ කර ඇතැයි පොලීසිය අධිකරණයට දැනුම් දී ඇත.

කොළඹ රිජ්වේ ආර්යා ළමා රෝහලේ එම් අයි සී යූ ඒකකයේ ප්‍රතිකාර ලබමින් සිටියදී ඉකුත් 27 වැනිදා මියගිය මොහොමඩ් පස්ලිම් හම්බි පස්ලිම් නමැති තුන් හැවිරිදි දරුවා මෙලෙස මියගොස් තිබු බව බොරැල්ල පොලීසිය අධිකරණයට කරුණු වාර්තා කර තිබේ.

තම පුත්‍රයා ඉකුත් 2020 වසරේ අප්‍රේල් මස 11 වැනිදා කාසල් කාන්තා රෝහලේදී උපත ලද අතර උපතේදී නීරෝගීමත් බර කිලෝ ග්‍රෑම් 3යි ග්‍රෑම් 550ක දරුවකු බවත්, මාස හයක් පමණ වන විට ඔහුගේ උදරයේ ගෙඩියක් වැනි දෙයක් දක්නට ලැබුණු බැවින් පෞද්ගලික රෝහලකට ගොස් වෛද්‍ය පරික්ෂණයක් සිදුකර ගත් බවත් දරුවාගේ මව සිය ප්‍රකාශයෙන් දක්වා ඇතැයි පොලීසිය අධිකරණයට කරුණු ඉදිරිපත් කර ඇත.