හර්ෂණ තුෂාර සිල්වා

 

රටේ පවතින ආණ්ඩුක්‍රම ව්‍යවස්ථාව අනුව හා තමන් වෙත පැවරී තිබෙන බලතල අනුව අග්‍රාමාත්‍යවරයා පත් කිරීම සිදු කළ බව ජනාධිපති මෛත්‍රීපාල සිරිසේන මහතා පවසා ඇත.

 

ශ්‍රී ලංකාවේ සිටින මහ කොමසාරිස්වරුන් සහ තානාපතිවරුන් හමුවෙමින් ජනාධිපතිවරයා එම කරුණු සඳහන් කර තිබේ.

 

නව ආණ්ඩුව නොබැඳි පිළිවෙත අනුගමනය කරමින් සෑම රටක් සමඟම ශක්තිමත් සබඳතා පවත්වාගෙන යන බවත් ශ්‍රී ලංකාවේ සංවර්ධන කටයුතු සඳහා සෑම රටකම සහයෝගය බලාපොරොත්තු වන බවත් ජනාධිපතිවරයා සඳහන් කර ඇත.

 

ජනාධිපති ලේකම් කාර්යාලයේදී අද (30) පස්වරුවේ පැවැති මෙම හමුවට තානාපතිවරුන් සහ මහ කොමසාරිස්වරුන් 40කට ආසන්න පිරිසක් සහභාගී වූ බව රාජ්‍ය තාන්ත්‍රික ආරංචි මාර්ග සඳහන් කළේය. 

 

රටේ මහජනතාවගෙන් සියයට 70ත් 75ත් අතර පිරිසක් වික්‍රමසිංහ මහතා අග්‍රාමාත්‍ය ධුරයෙන් ඉවත් කළ යුතුය යන මතයේ සිටින බවත් ජනතාවගේ හද ගැස්ම හඳුනා ගනිමින් මහින්ද රාජපක්ෂ මහතා අග්‍රාමාත්‍යවරයා ලෙස පත් කිරීමේ තීරණය ගත් බවත් ජනාධිපතිවරයා මෙහිදි තානාපතිවරුන් සහ මහ කොමසාරිස්වරුන් හමුවේ පවසා ඇති බවත් එම ආරංචි මාර්ගවලින් කියැවිණි. 

 

ප්‍රජාතන්ත්‍රවාදය, මානව හිමිකම්, මාධ්‍ය නිදහස, සාමය සහ සියලු ජාතීන් අතර සහජීවනය තවදුරටත් තහවුරු කරමින් ශක්තිමත්ව ඉදිරියට යෑම බලාපොරොත්තුව බව ද ජනාධිපති මෛත්‍රීපාල සිරිසේන මහතා එහිදි තවදුරටත් සඳහන් කර ඇත.