(මුදිතා දයානන්ද)

කුමන ආකාරයේ වාද විවාද සංවාද තිබුණද ජනතා ඉල්ලීම අනුව ජනතාවගෙන් මතුවන නායකයෙක් තෝරාගැනීම සඳහා අවසන් තීන්දුව පක්ෂයේ සියලු දෙනා එකතු වී ගන්නවා ඇතැයි තමන් විශ්වාස කරන බව අමාත්‍ය කබීර් හෂීම් මහතා අද (09) පැවසීය.

අමාත්‍යවරයා මෙසේ පැවසුයේ බත්තරමුල්ලේ පිහිටි මහාමාර්ග, මාර්ග සංවර්ධන හා ඛනිජ තෙල් අමාත්‍යංශයේ පැවති මාධ්‍ය හමුවකදීය.

රණසිංහ පේ‍්‍රමදාස මහතා වැනි පොඩි මිනිසුන්ගෙන් නැගී ආ නායකයෙකුට ජනාධිපති වීමට අවස්ථාව සළසා දුන්නේද ගොවි පුතෙක් වූ මෛත්‍රීපාල සිරිසේන මහතාට ජනාධිපති වීමට අවස්ථාව සළසා දුන්නේද එක්සත් ජාතික පක්ෂය වන අතර මෙවර ජනාධිපතිවරණයේදීද ජනතා ඉල්ලීමට ඇහුම්කන් දී අපේක්ෂකයා නම් කෙරෙනු ඇතැයි විශ්වාස කරන බවද ඔහු පැවසීය.

පක්ෂය තුළ ජනාධිපති අපේක්ෂකයා ගැන විවිධ මතවාද මතුව ඇති අතර එය ප‍්‍රජාතන්ත‍්‍රවාදයේ ලක්ෂණයක් බවද පක්ෂ නායකයා සිටියදී මෙතෙක් කාලයක් ඊට පරිභාහිර පුද්ගලයන් ජනාධිපති අපේක්ෂකයන් ලෙස එජාපය තෝරාගත්තේද ඒ ප‍්‍රජාතන්ත‍්‍රවාදය නිසා බවද වෙනත් පක්ෂයක පක්ෂ නායකයා සිටියදී තමන් අපේක්ෂකයා යැයි පැවසුවහොත් සුදුවෑන්වලින් ගෙන යා හැකි බවද ඔහු පැවසීය.

තමන් පිළිබඳවද ඇතැමුන් චෝදනාත්මකව කතා කරන නමුත් පක්ෂ අභ්‍යන්තරයේ කතා කරන කිසිවක් එළියේ කතා කිරිම පක්ෂයේ ප‍්‍රතිපත්තිවලට පටහැනි බැවින් තමන් ඒ ගැන කිසිවක් නොකියන බවද ඔහු පැවසීය.

එක්සත් ජාතික පක්ෂ ආණ්ඩුව ගෙනාවේ ඇමරිකන් සහයෙන් බවට සමහරු චෝදනා කළත් එවැනි කිසිම සහයක් කිසිවෙක්ගෙන් පක්ෂයට නොලැබුණ අතර අද ඉදිරිපත්ව සිටින එක ජනාධිපති අපේක්ෂකයෙක් ඇමරිකන්ද නැත්නම් ශ‍්‍රි ලාංකිකද යන ප‍්‍රශ්නය තවමත් විසඳී නැතැයිද අමාත්‍ය කබීර් හෂීම් මහතා මෙහිදි වැඩිදුරටත් පැවසීය.