(තිලකරත්න දිසානායක)

දිවයිනෙහි විවිධ ප්‍රදේශයන්හිදී කොල්ලකෑම් ඇතුලු අපරාධ ගණනාවකටම සම්බන්ධ බව කියන අපරාධ කරුවන් දෙදෙනෙකු , ගිනි අවියක් සමග අත්අඩංගුවට ගත් බව ගම්පහ පොලීසිය  කියයි.

සංචරණ නීති කඩකරමින් සැක සහිත පුද්ගලයින් දෙදෙනෙකු සැරිසරන බවට දොරණාගොඩ ප්‍රදේශවාසීන් විසින් ගම්පහ මූලස්ථාන ප්‍රධාන පොලිස් පරීක්ෂකවරයාට කළ දැනුම්දීමකට අනුව මොවුන් අත් අඩංගුවට ගෙන  තිබේ.

ඔවුන් පරීක්‍ෂා කිරීමේදී අයෙකුගේ යට ඇදුම තුළ සඟවාගෙන සිටි මෙරට නිශ්පාදිත ටී කටස් නමින් හදුන්වන ගිනි අවියක් සහ ටී 56 ප්‍රමාණයේ උණ්ඩ කිහිපයක් තිබී සොයා ගැනීමට හැකිවූ බව මූලස්ථාන ප්‍රධාන පොලිස් පරීක්ෂක සමන් ජයසිංහ මහතා පැවසීය. 

මොවුන් වලස්මුල්ල ප්‍රදේශයේ පදිංචි 34 හැවිරිදි දෙදෙනෙකු වන බවත් මින් අයෙකු ගෙවල් බිදුම් ඇතුලු අපරාධ අටක් සම්බන්ධයෙන් පල්ලෙතැන්න රක්ෂිත බන්ධනාගාරයේ රදවා සිටියදී ඉන් පළාවිත් සිටින වරෙන්තු අටක් පිට සිටින්නෙකු බවත් අනාවරණය වී ඇත. 

අනෙකාද අපරාධ හතකට සම්බන්ධ බවට තොරතුරු අනාවරණය වී ඇති බවත් මොවුන් බදුල්ල , අනුරාධපුර,  දික්වැල්ල , කුලියාපිටිය ඇතුලු විවිධ ප්‍රදේශයන්හිදී ගෙවල් බිදුම් ඇතුලු අපරාධ සිදු කොට ඇති බවත් හෙලිව ඇති බවත් පොලීසිය පවසයි. 

මොවුන් දෙදෙනා බන්ධනාගාරගතව සිටි කාලය තුල දැන හැදිනගත් අපරාධකරුවන්ගේ සම්බන්ධතා මත දිවයිනෙහි විවිධ ප්‍රදේශයන්හි කොල්ලකෑම් ආදිය සිදුකොට ඇති බවද අනාවරණය වී ඇති අතර මොවුන්ට ගම්පහ ප්‍රදේශයේ අපරාධ සිදු කිරීම සදහා සහයෝගය ලබා දෙන පිරිස් සිටීද යන්න සොයා බැලීම සිදු කරන බවත් උප පොලිස් පරීක්ෂක බිනුර රණසිංහ මහතා සදහන් කළේය.