(යොහාන් භාසුර)

කුකුළු මස් මිල සාමාන්‍ය ජනතාවට දැරිය නොහැකි ඉතා ඉහළ මට්මටක පැවැතීම නිසා කුකුළු මස් ආනයන කිරීමට තීරණය කළ බව වෙළෙඳ වාණිජ හා ආහාර සුරක්ෂිතතා අමාත්‍ය නලින් ප්‍රනාන්දු මහතා අද (31) පැවසීය.

ජනාධිපතිවරයාගේ මූලිකත්වයෙන් මේ මස 27 වනදා පැවැති ජීවන වියදම් කමිටු රැස්වීමේදී කර්මාන්ත සඳහා අවශ්‍ය කුකුළු මස් ආනයනය කිරීමට එකඟ වූ බවත් වෙළෙඳපොළ ඉහළ යන කුකුළු මස් මිල පහත දමන ලෙස දේශීය නිෂ්පාදකයන් දැනුවත් කළ ද ඔවුන්ගෙන් සාධනීය ප්‍රතිචාරයක් හිමි නොවූ බවත් අමාත්‍යවරයා කීය.

කුකුළු මස් කිලෝවක් දේශීය වෙළෙඳපොලේ පවතින රුපියල් 1,450 කට වඩා අඩු මිලකට මෙම ආනයනය කරන කුකුළු මස් කර්මාන්ත සඳහා දීමට හැකියාව ලැබෙන බව ද කී අමාත්‍යවරයා සඳහන් කළේ ඒ අනුව එම කර්මාන්ත ආශ්‍රිත නිෂ්පාදනයන්හි මිල අඩු වීමක් අපේක්ෂා කරන බව ද සඳහන් කළේය.

වෙළෙඳපොලේ කුකුළු මස් මිල ඉහළ යාම තව දුරටත් පාලනය කිරීමට නොහැකි වුවහොත් සාමාන්‍ය ජනතාව වෙනුවෙන්ද කුකුළු මස් ආනයනය කර දීමට කටයුතු කරන බවද අමාත්‍යවරයා වැඩි දුරටත් කීය.

වෙළෙඳ වාණිජ හා ආහාර සුරක්ෂිතතා අමාත්‍ය නලින් ප්‍රනාන්දු මහතා වෙළෙඳ අමාත්‍යාංශයේදී අද (31) පැවැති මාධ්‍ය හමුවකදී එසේ පැවසීය.