(දිලීප් ජයසේකර)

දේශීය එළවළු හා පළතුරු වර්ග පිටරට යැවීමේ විශේෂ වැඩපිලිවෙලක් මේ වන විට මත්තල රාජපක්ෂ ගුවන් තොටුපොළ හරහා ආරම්භ කර ඇති බවත් ඒ අනුව ප්‍රථම දේශීය එළවළු හා පළතුරු තොගය රැගත් ගුවන් යානය මත්තල රාජපක්ෂ ගුවන්තොටුපොළෙන් සිට අද (16) අලුයම ඕමානයේ මස්කට් නුවර බලා පියාසර කළ  බවත් මත්තල රාජපක්ෂ ගුවන් තොටුපොලේ ප්‍රධාන කළමණාකරු උපුල් කලංසුරිය මහතා පැවසිය.

 ශ්‍රී ලංකාවේ  වගා කළ එළවළු හා පළතුරු  කිලෝ 3,371ක් සලාම් එයාර් ගුවන් සේවයට අයත් OV 1432 දරණ ගුවන් යානයෙන් මෙලෙස මත්තල රාජපක්ෂ ගුවන් තොටු පොලේ සිට ඕමාන් රාජ්‍ය කරා රැගෙන යාම සිදු කෙරුණි.

 සලාම් එයා ගුවන් සේවයට අයත් මෙම ගුවන් යානය ඊයේ (15) රාත්‍රි 11.20ට දෝහා කටාර් හා ඕමානයේ රැදී සිටි ශ්‍රි ලාංකිකයින් 150 දෙනෙකු රැගෙන මත්තල රාජපක්ෂ ගුවන් තොටුපොලට පැමිණි අතර පසුව එම ගුවන් යානය ඕමානයේ රැකියා සදහා පිටත්ව ගිය ශ්‍රි ලාංකික මගින් 14 දෙනෙකු හා මෙරට වගා කළ  එළවළු හා පළතුරු තොගයක්ද රැගෙන නැවත ඕමානයේ මස්කට් නුවර බලා පිටත්ව ගියේය.

 මෙහිදී සළාම් එයා ගුවන් සේවයේ සහකාර ගුවන් තොටුපොල කළමණාකරු රවී ද සිල්වා මේසේ පැවසීය.

අපි පළමු වතාවට තමයි මත්තල රාජපක්ෂ ගුවන් තොටු පොළට පැමිණියේ .ඇත්තටම මෙහි තියෙන පහසුකම් පිළිබදව අපි ගොඩක් සතුටු වෙනවා.

අද අපි පළමු වරට ශ්‍රි ලංකාවේ නිෂ්පාධිත එළවළු හා පළතුරු තොගයක් ඕමානය බලා රැගෙන යනවා.ඉදිරියේදීත් අපි මේ විදියට ශ්‍රි ලාංකික එළවළු හා පළතුරු විවිධ රටවල් කරා රැගෙන යාමේ විශේෂ වැඩ සටහනක් මත්තල රාජපක්ෂ ගුවන් තොටුපොළ මුලික කරගෙන ක්‍රියාත්මක කිරිමට බලාපොරොත්තු වෙනවා යැයි පැවසීය.

 

්‍