(උපුල් හේරත් සහ පාලිත මඩුගල්ල)

පවතින අයහපත් කාලගුණ තත්ත්වය හේතුවෙන් උඩ දුම්බර ප්‍රාදේශීය ලේකම් කොට්ඨාසයට අයත් ග්‍රාම නිලධාරී වසම් විස්සක පමණ නාය යෑම්,හා ගිලාබැසීම් නිසා පවුල් 600ක් පමණ සිරවී ඇතැයි උදුම්බර ප්‍රාදේශීය ලේකම් කාර්යාලය කියයි.

උඩදුමිබර ප්‍රාදේශීය ලේකම් කොට්ඨාසයේ ග්‍රාම නිලධාරී වසම් 20 ඇතුළත ඉතාමත්ම බරපතල තත්ත්වයේ ආපදා සිදුව ඇත්තේ කලල්ගමුව,මිනුවන්ගමුව, නැගෙනහිර බඹර බැද්ද, බටහිර බඹර බැද්ද හා දෙන්නේගම,යන ග්‍රාම නිලධාරී වසම් වලටය.

ඇද හැලුන දහරා නිපාත වර්ෂාවත්,අධික මීදුමත් හේතුවෙන්,ජනතාවට දැඩි ලෙස පීඩා ඇතිවී ඇති අතර එයින් බේරීමට ඔවුහු දැඩි සේ උත්සාහ දරා ඇති බවට වාර්තා වේ.

කලර්ගමුව ග්‍රාමයේ පිහිටි දළුක්කුඹුර කන්ද ගිලා බැසීමක් සිදුව ඇතැයි ආපදා කළමනාකරණ ඒකකය කියයි.

එසේම, දෙවින්නේගමද ගිලා බැසීමක් සිදුවෙමින් පවතින බව ආපදා කළමනාකරන ඒකකයේ නිලධාරීන් සඳහන් කළහ.

මෙම ගම්මානවල රැඳී සිටි පවුල් තිහක පමණ පිරිසක් බෝපාත විහාරස්ථානයට හා බඹර බැද්ද විහාරස්ථානය වෙත රැගෙන ගොස් ඔවුනගේ ජීවිත ආරක්ෂා කිරීම සඳහා සියලු විධිවිධාන සලසා ඇති බව ප්‍රාදේශීය ලේකම් කාර්යාලය කියයි.

ඊට අමතරව සුළු වශයෙන් ආපදාවන්ට ලක්ව ඇති ගම්මානවල ආසන්නයේ පිහිටි ප්‍රජා ශාලාවන්ද කඳවුරු ලෙසට යොදා ගැනීමට කටයුතු කරන බව ආපදා කළමනාකරණ ඒකකය කියයි.