(අංජුල මහික වීරරත්න)

දුෂණ වංචා චෝදනා එල්ල වී තිබෙනවා නම් ඔවුන් පිරිසිදු කරන්න සමගි ජන බලවේගය කටයුතු කරන්නෙත් නැතැයි පාර්ලිමේන්තු මන්ත්‍රී  එස්.එම් මරික්කාර් මහතා පැවැසීය.

සමගි ජන බලවේගය පිරිසිදු පක්ෂයක් බව කී මන්ත්‍රීවරයා  දුෂණ වංචා චෝදනා එල්ල නොවුන පිරිසිදු දේශපාලනයක නිරත වන පිරිසක් සමගි ජනබලවේගයේ සිටින බව සඳහන් කළේය. 

මරික්කාර් මහතා මේ බව කීවේ සමගි ජන බලවේග ප්‍රධාන කාර්යාලයේ අද (13) පැවැති මාධ්‍ය හමුවට සහභාගී වෙමිනි.

"දේශපාලඥයෙක් වංචාවක දුෂණයක සම්බන්ධයි නම් , දුෂණ වංචා චෝදනා එල්ල වී තිබෙනවා නම් ඔවුන්ව පිරිසිදු කරන්න සමගි ජනබලවේගය කටයුතු කරන්නෙත් නැහැ. ඒ වගේම යම් යම් දේශපාලන කඳවුරු වලට සමගි ජනබලවේගය විසින් එල්ල කළ චෝදනා අදටත් වලංගු වෙනවා. 

කෙසේ නමුත් වර්තමාන ආණ්ඩුවට පසුගිය ආණ්ඩුවල සිටි දේශපාලඥයින් කළැයි කියන වංචා දුෂණ ඔප්පු කර ගැනීමට ශක්තියක් නැහැ. කෙසේ හෝ සමගි ජනබලවේගය ඇතැම් දේශපාලඥයින්ට එල්ල කළ චෝදනා වෙනුවෙන් සමගි ජනබලවේගය අදටත් පෙනී සිටිනවා. ඒ වගේම ආණ්ඩු බලය තිබෙන්නේ සමගි ජනබලවේගයට නෙවෙයි. ඒ නිසා ආණ්ඩු බලය තිබෙන ජාතික ජනබලවේගය එම චෝදනා ඔප්පු කරන්න වහාම කටයුතු කළ යුතුයි යනුවෙන්ද මන්ත්‍රීවරයා කීය.