(*** සුජිත් හේවාජුලිගේ)

විදේශයන්හි සිට අපරාධ මෙහෙයවන නමගිය අපරාධකරුවන් දස දෙනකු අත්අඩංගුවට ගැනීමට ජාත්‍යන්තර පොලිසියෙන් (INTERPOL) රතු නිවේදන ලබාගෙන ඇතැයි අපරාධ හා සංවිධානාත්මක අපරාධ අංශය බාර නියෝජ්‍ය පොලිස්පති ප්‍රියන්ත ජයකොඩි මහතා පැවැසීය.

මින් වැඩි පිරිසක් මෙරට ප්‍රසිද්ධ පාතාල කල්ලිවල නායකයන් බව කී නියෝජ්‍ය පොලිස්පතිවරයා මෙම අපරාධකරුවන් අත්අඩංගුවට ගෙන මෙරටට රැගෙන ඒමට විශේෂ වැඩපිළිවෙළක් ක්‍රියාත්මක කර ඇති බව සඳහන් කළේය.

ජාත්‍යන්තර පොලිසියෙන් රතු නිවේදන ලබාගෙන සිටින මෙම අපරාධකරුවෝ සියලු දෙනා මෙරටදී මිනීමැරුම්, මංකොල්ලකෑම්, කප්පම් ගැනීම් හා ස්ත්‍රී දූෂණ යනාදී විවිධ අපරාධ සිදු කර නීතියෙන් බේරීම සඳහා විදේශයන්ට පලාගොස් සිටින අය වෙති.

මේ අපරාධකරුවන් මෙරටට රැගෙනවිත් නීතිය ක්‍රියාත්මක කිරීමට බලාපොරොත්තු වන බවද ජයකොඩි මහතා කීය.
මේ අතර බස්නාහිර පළාතේ පසුගිය කාලයේදී ප්‍රධාන පෙළේ අපරාධ කණ්ඩායම් එකොළහක් ක්‍රියාත්මක වූ බව කී ප්‍රියන්ත ජයකොඩි මහතා මින් කල්ලි හයක්ම විවිධ හේතු මත මේ වනවිට අක්‍රීය තත්ත්වයේ පවතින බව ද ප්‍රකාශ කළේය.
අනෙක් කල්ලි පහ කුඩා කුඩා සිද්ධි ඇති කරමින් ක්‍රියාත්මක වෙමින් සිටින බව ද ඔහු පැවැසීය.

අධිකරණයෙන් දඬුවම් ලැබූ නමගිය අපරාධකරුවන් සේම අධිකරණයෙන් වරදකරුවන් නොවුණු අපරාධකරුවන් පිරිසක් ද සමාජයේ ක්‍රියාකාරීව සිටින බව කී නියෝජ්‍ය පොලිස්පතිවරයා මේ සියලු අපරාධ කල්ලි සතුව පවතින අවි ආයුධ නිරායුධ කිරීම කඩිනම් අවශ්‍යතාවක් බව ද කීය.

ඒ සඳහා අවශ්‍ය කටයුතු කරගෙන යන බව ද ඔහු පැවැසීය.

සියලු පාතාල කල්ලිවල පදනම මත්ද්‍රව්‍ය යැයි නියෝජ්‍ය පොලිස්පතිවරයා ප්‍රකාශ කළේය.