2023 මාර්තු මස 23 වන බ්රහස්පතින්දා
‘දුෂණ චෝදනා ඇති අයට අමාත්‍යංශ ලේකම් තනතුරු එපා’
(විනීතා එම් ගමගේ)
යහපත් තීරණ අනුව රට මෙහෙයවීමේ ප‍්‍රධාන භූමිකාවක් හොබවන අමාත්‍යංශ ලේකම්වරුන් පත්කිරීමේ දී දූෂණ චෝදනා එල්ල වූ හෝ ජනාධිපතිවරණ කාලය තුළ මැතිවරණ නීති උල්ලංඝණය කළ හෝ රාජ්‍ය නිලධාරින් පත් නොකිරීමට කටයුතු කරන ලෙස ඉල්ලමින් පැෆරල් සංවිධානය ජනාධිපති ගෝඨාභය රාජපක්ෂ මහතා වෙත ලිපියක් යවා ඇත.
මේ වනවිට පසුගිය මැතිවරණයේ යම් යම් අක‍්‍රමිකතාවයන් සම්බන්ධයෙන් චෝදනා ලැබු සහ විනය පරික්ෂණවලට ලක්වූ රාජ්‍ය නිලධාරින් සමහරු මෙන්ම පසුගිය කාලසීමාව තුළ මහත් ආන්දෝලනයට ලක්වූ නිලධෘරින් ද අමාත්‍යංශ ලේකම් තනතුරු වැනි උසස් නිලයන් සඳහා යෝජනා වී ඇතැයි වාර්තා වී ඇති බව ද එහි සඳහන්ව ඇත.
සම්ප‍්‍රදායික පක්ෂ දේශපාලන යාන්ත‍්‍රණයෙන් බැහැර පුද්ගලයකු ලෙස ජනාධිපතිවරයා මෙතෙක් ගත් යහපත් තීරණවල දී මෙවැනි පුද්ගලයින් ගෙන් හානි විය හැකි යැයි එම ලිපිය මගින් පෙන්වා දී තිබේ.
ජනාධිපතිවරයා ලෙස පත්වීමෙන් පසු මේ දක්වා ගනු ලැබූ බොහොමයක් තීරණ පැසසිය යුතු ඒවා බවත් ඒ අතර ඇති කැබිනට් මණ්ඩලය අවම කිරීම අමාත්‍යංශවල ජනාධිපතිවරයාගේ ඡායාරූපය පමණක් ප‍්‍රදර්ශනය නොකිරීම පරිවාර රථ අඩුකිරීම, කාර්ය මණ්ඩලය සීමා කිරීම, රාජ්‍ය නිලධාරින්ගේ විදේශ ගමන් අවම කිරීම වැනි තීරණ මහජන ප‍්‍රසාදයටත් ගෞරවයටත් හේතු වන බව ද එහි සඳහන් වේ.
