(අංජුල මහික වීරරත්න)

රට මුහුණ පා ඇති ආර්ථික අභියෝගය ජය ගත ගැනීමට එකම මඟ විදේශ සංචිත අර්බුදය විසඳා ගැනීම යැයිද ඒ සඳහා අග්‍රාමාත්‍ය රනිල් වික්‍රමසිංහ මහතා ජාත්‍යන්තර සහයෝගය ලබාගැනීමට පුළුල් වැඩපිළිවෙලක් දියත් කර තිබෙන බව එක්සත් ජාතික පක්ෂ සභාපති වජිර අබේවර්ධන මහතා පැවසීය.

සමස්ත ආර්ථිකය කඩා වැටී විදේශ සංචිත නොමැති රටක් නැවත නගා සිටුවීම ලෙහෙසි පහසු කාර්යයක් නොවන බව කී වජිර අබේවර්ධන මහතා අඩුම තරමින් ආර්ථිකය කඩා වැටීම ආරම්භ වන විටම එයට පිළියම් යෙදීමට කටයුතු කළේ නම් අද මේ අසීරු තත්ත්වයට මුහුණදීමට සිදුනොවන බව සඳහන් කළේය.

අද වන විට රට ගෑස්, ඉන්ධන, විදුලිය සහ ආහාර හිඟයට එහා ගිය බරපතළ තත්ත්වයකට මුහුණ දී සිටින බව කී අබෙිවර්ධන මහතා බරපතල ලෙස කඩා වැටුණු ආර්ථිකය නැවත ගොඩ ගැනීම ප්‍රධාන අභියෝගය බවට පත්ව තිබෙන බවද කීය.