(අංජුල මහික වීරරත්න)

ජනතාව පෝලිම් වල දුක් විඳිමින් අසීරුතාවයකට මුහුණ දී සිටි සමයේ පාර්ලිමේන්තු පාරෙන් වත් යන්නට බිය වූ දේශපාලකයන් දැන් රට යහපත් අතට ගෙන එන එමින් සිටියදී බලය ලබා ගැනීමට කුරුමානම් අල්ලන බව එක්සත් ජාතික පක්ෂ සභාපති පාර්ලිමේන්තු මන්ත්‍රී වජිර අබේවර්ධන මහතා පැවසීය.

දැන් බලය ලබාගන්නට කුරුමානම් අල්ලන දේශපාලකයන් එදා ජනතා අසීරුතා හමුවේ ඒවාට විසඳුම් ලබා දීමට ඉදිරිපත් නොවී ජනතාව අතරින් වසන්වී හැංඟී සිටි බවද වජිර අබේවර්ධන මහතා කීය.

එදා පාර්ලිමේන්තුවේ තනි මන්ත්‍රීවරයකු ලෙස සිටි රනිල් වික්‍රමසිංහ මහතා රට නැවත හරි මඟට ගැනීමේ අභියෝගය බාරගෙන සාර්ථකත්වයට පත් වෙමින් සිටින බව කී අබේවර්ධන මහතා දැන් බලය ගන්නට උත්සාහ කරන අය රට නගන්නට තිබෙන වැඩපිළිවෙළ කුමක්දැයි රටේ ජනතාවටත් ලෝකයාටත් ප්‍රසිද්ධියේ හෙළි කළ යුතු බව සඳහන් කළේය.