(කරාපිටිය - ජී.ඩබ්ලිව්.කේ.ප්‍රේමතිලක ද සිල්වා)

හිනිදුම කල්වාරි දේවස්ථානයේ පැවැත්වීමට නියමිත වාර්ෂික උත්සවය මේ වසරේදී බැතිමතුන් ඒකරාශි වීමෙන් තොරව පවත්වන ලෙස ගාල්ල පදවිය භාර රදගුරු රේමන්ඩ් වික්‍රමසිංහ හිමිපාණන් උපදෙස් දුන් බව ගාල්ල දිස්ත්‍රික් ලේකම් සෝමරත්න විදානපතිරණ මහතා පැවසීය.

කොරෝනා වසංගතය හේතුවෙන් මේ මස 24 සිට අප්‍රේල් මස 12 දක්වා පැවැත්වීමට නියමිතව තිබූ හිනිදුම කල්වාරි දේවස්ථානයේ පැවැත්වීමට නියමිත වාර්ෂික උත්සවය මේ වසරේදී පමණක් නවත්වන්නැයි ප්‍රදේශවාසීහු ඉල්ලීමක් කළහ.

ඒ සම්බන්ධයෙන් සලකා බැලීමට ගාල්ල පදවිය භාර රදගුරු රේමන්ඩ් වික්‍රමසිංහ හිමිපාණන්, කල්වාරි පුදබිම භාර පියතුමන් සහ ගාල්ල දිස්ත්‍රික් ලේකම් සෝමරත්න විදානපතිරණ මහතා අතර සාකච්ඡාවක් අද (14) සවස පැවැත්විණි.

අගරදගුරු අති උතුම් මැල්කම් කාදිනල් රංජිත් හිමිපාණන් සියළුම දේවස්ථාන බාර පියතුමන්ලාගෙන් ඉල්ලා ඇත්තේ පවතින තත්වය ගැන සලකා සියළුම දේව මෙහෙයන් මේ මස අගදක්වා නොපවත්වන ලෙසයි.

කෙසේ වෙතත් සාකච්ඡාව අවසානයේදී පැමිණි තීරණය වන්නේ හිනිදුම කල්වාරි දේවස්ථානයේ වාර්ෂික උත්සවය ජනයා ඒකරාශි වීමෙන් තොරව පවත්වන ලෙසයි.