(අංජුල මහික වීරරත්න)

අතීතයේ පටන් සෞඛ්‍ය ක්ෂේත්‍රයේ පැවැති  අභියෝග ජයගන්නා බව සෞඛ්‍ය හා ජනමාධ්‍ය අමාත්‍ය වෛද්‍ය නලින්ද ජයතින් මහතා පැවසීය.

ජනතාවගේ සුවතාවය ආරක්ෂා කිරීම රජයේ අරමුණ බවද අමාත්‍යවරයා කීය.

ආරෝග්‍යා සුවතා මධ්‍යස්ථාන දහසක් රට පුරා පිහිටුවීමේ ව්‍යාපෘතියේ පළමු මධ්‍යස්ථානය ලෙස ගාල්ල මාපලගම ආරෝග්‍යා සුවතා මධ්‍යස්ථානය ජනතා අයිතියට පත් කරමින් අමාත්‍යවරයා මේ බව කීය.

මෙම මධ්‍යස්ථානය මඟින් මාපලගම, තල්ගස්වල, ගෝනලගොඩ සහ ගෝනලගොඩ නැගෙනහිර යන ග්‍රාමනිලධාරී වසම්වල ජීවත්වන පන්දහසකට ආසන්න ජනතාවකට සුව සේවාවන් සැපයෙනු ඇත.

නව රජයේ “සුවපත් රටක් උදෙසා” (HEALTHY SRI LANKA) නව්‍ය වැඩසටහන යටතේ ක්‍රියාත්මක වන මෙම ව්‍යාපෘතිය යටතේ මෙම වර්ෂයේ  දී ප්‍රාථමික සෞඛ්‍ය සත්කාර මධ්‍යස්ථාන සියයක් ජනගත කිරීමට නියමිත අතර, ජනතාවට වඩාත් සමීප, පහසුවෙන් ප්‍රවේශ විය හැකි ස්ථානයක ස්ථාපිත කෙරෙන  මෙම ප්‍රාථමික සෞඛ්‍ය සත්කාර මධ්‍යස්ථානය "ආරෝග්‍යා සුවතා මධ්‍යස්ථාන" ලෙස නම් කර ඇත.