(අංජුල මහික වීරරත්න)

මෙවර මහ කන්නයේ වී වගාව සඳහා අවශ්‍ය සම්පූර්ණ යූරියා පොහොර ප්‍රමාණයම හෙට (16) සිට සියලුම ගොවිජන සේවා මධ්‍යස්ථාන මඟින් නිකුත් කිරීමට කටයුතු යොදා ඇතැයි කෘෂිකර්ම, වනජීවී හා වන සම්පත් සංරක්ෂණ අමාත්‍ය මහින්ද අමරවීර මහතා පැවසීය.

කොළඹ වරායට ළඟා වී ඇති යූරියා පොහොර මෙට්‍රික් ටොන් 22,000 ක් සහිත නෞකාවෙන් පොහොර ගොඩබෑම නිරීක්ෂණය කිරීමට සහභාගී වෙමින් අමාත්‍යවරයා මේ බව ප්‍රකාශ කළේය.

යූරියා පොහොර මලුවලට පිරවීමේදී නියමිත බර සහිත ද යන්න සම්බන්ධව වැඩි අවධානයක් යොමු කරන ලෙස අමාත්‍යවරයා එහිදී එම නිලධාරීන්ට උපදෙස් දුන්නේය.

එහිදී මාධ්‍යට අදහස් පළ කළ අමාත්‍යවරයා කීවෙි මේ වනවිට පොහොර සමාගම් දෙකෙහිම ගබඩා සියල්ල පොහොරවලින් පිරීගොස් ඇති බවත්, තවත් පොහොර ගබඩා කිහිපයක් කුලී පදනම මත ලබා ගැනීමට සිදුව ඇති බවත්ය. 

 ඇතැම් ගොවිජන සේවා මධ්‍යස්ථානවල කටයුතු කරන නිලධාරීන් ගොවි ජනතාවට ගොවිතැන එපාවන ආකාරයට කටයුතු කරන බවට තමන්ට තොරතුරු ලැබී ඇති බවත්, එවැනි නිලධාරීන් සම්බන්ධව දැඩි විනයානුකූල පියවර ගන්නා බවත්, අවශ්‍ය වුවහොත් එවැනි නිලධාරීන්ගේ වැඩ තහනම් කිරීමට පවා කටයුතු කරන බවත් අමාත්‍යවරයා සඳහන් කළේය.