(සිතුම් චතුරංග)

මත්ද්‍රව්‍ය නිවාරණය පිළිබඳ දේශන පාසල්වල  නොපවත්වන ලෙස පියාට දැණුම්දෙන්නැයි තර්ජනය කරමින් මහජන සෞඛ්‍ය පරීක්ෂකවරයකුගේ පුත්‍රයකුට පහරදී ඇතැයි සිලාවතුර පොලිසිය කියයි.

පහරදුන් බව කියන බාලවයස්කාර පාසල් සිසුන් ඇතුළු සැකකරුවන් හයදෙනකු මන්නාරම , සිලාවතුර ප්‍රදේශයේදී අත්අඩංගුවටගත් බව ද සිලාවතුර පොලිසිය පවසයි.

පහරකෑ සිසුවා මේ වන විට මන්නාරම රෝහලට ඇතුලත් කොට ඇති බවද පොලිසිය පැවසීය.

මහජන සෞඛ්‍ය පරීක්ෂකවරයාගේ නිවස ආසන්නයට පැමිණි පිරිස ඔහුගේ පුත්‍රයා නිවසින් පිටතට රැගෙන ගොස් පියා විසින් පවත්වන මත්ද්‍රව්‍ය නිවාරණ දේශන නවතා දමන ලෙසත් පාසල් තුල පැවැත්වෙන එවැනි දේශනවලට නැවත සහභාගී නොවන ලෙසට ඔහුට පවසන ලෙසත් ප්‍රකාශ කරමින් සැකකරුවන් මෙම පහරදීම සිදුකොට ඇති බවට පහරකෑ පුත්‍රයා ප්‍රකාශ ලබාදී ඇති බව පොලිසිය සඳහන් කළේය.

එලෙස පහරදීමෙන් තුවාල ලබා රෝහල් ගතකොට ඇත්තේ වයස අවුරුදු 15ක පාසල් සිසුවකු වේ.

පහරදීමෙන් තුවාල ලැබූ සිසුවාගේ තත්වය බරපතල නොවන බවත් මන්නාරම රෝහල් ආරංචිමාර්ග සඳහන් කරයි.

පොලිසිය පැවසූයේ මෙම පහරදීම මත්ද්‍රව්‍ය දේශන පැවැත්වීම හා මත්ද්‍රව්‍ය සම්බන්ධ ගැටළුවක්ද නැතිනම් වෙනත් පුද්ගලික කාරණාවක්ද යන්න සොයාබැලීම සඳහා විමර්ශන පැවැත්වෙන බවයි.