(රොමේෂ් මධුෂංඛ)

යාපනය පුන්කුඩතිව් ප්‍රදේශයෙන් කොරෝනා ආසාදිතයෙකු වාර්තා වීමත් සමග එම ගම්මානයට ඇතුළු වීම හා පිටවීම සීමා කිරීමට ආරක්ෂක අංශ හා සෞඛ්‍ය නිලධාරීන් පියවර ගෙන ඇත.
 
පුන්කුඩතිව් ප්‍රදේශයෙන් වාර්තා වූ කොරෝනා ආසාදිත කාන්තාව මිනුවන්ගොඩ ඇඟලුම් ශාලාවේ සිට ඩබ්ලිව්.පී.එන්.ඩී. 6503 නැමති බස් රථයෙන් යාපනයට ගොස් ඇති අතර, යාපනයේ සිට පුන්කුඩතිව් සිය නිවස දක්වා එන්.පී.එන්.ඩී. 8790 නැමති බස් රථවල ගමන් කර ඇති බවට තොරතුරු අනාවරණය වී ඇත. එම බස් රථවල ගමන්ගත් මගීන් ළඟම පිහිටි පොලීසියට හෝ සෞඛ්‍ය නිලධාරී කාර්යාලයට දැනුම් දෙන ලෙසට පොලිසිය විසින් මහජනයා දැනුවත් කරන ලදී.
 
පුන්කුඩතිව් ගම්මානයේ පදිංචිකරුවන්ට ඉන් පිටව යාමේදී අත්‍යවශ්‍ය කරුණක් සඳහා පමණක් පිටව යාමටත් පිටස්තර සිට පැමිණෙන අයෙකුට ගම්මානයේ පදිංචි නම් පමණක් ඇතුළු විය හැකි අයුරින් සීමා පැනවීමටත් කටයුතු යොදා ඇත.
 
එමෙන්ම කොරෝනා ආසාදිත කාන්තාව ගමන්ගත් බස් රථවල සිටි යාපනය, නාගදීපය, පුන්කුඩතිව් ආදි ප්‍රදේශයන්හි 100කට වැඩි පිරිසක් නිරෝධායනය සඳහා යොමු කර ඇති අතර යාපනයේ සියලුම වැසියන් නිසි සෞඛ්‍ය ආරක්ෂිත පියවර අනුගමනය කරන ලෙසටද සෞඛ්‍ය බලධාරීන් ජනතාව දැනුවත් කර ඇත.