( තිලකරත්න දිසානායක)

සිව් දිනක් වයසැති බිළිඳකු සමග ගම්පහ නගරයේ පදික වේදිකාවේ සිටි මව් පිය යුවළකට ගම්පහ පුරපති එරංග සේනානායක මහතා විසින් රැකවරණය ලබා දීමට පියවර ගනු ලැබීය.

සංචරණ ඇදිරි නීතිය පවතින මෙම කාලසීමාව තුළ ගම්පහ නගරයේ වෙසෙන යාචකයන්ට ආහාර පාන ලබාදීමට පුරපතිවරයා පියවර ගෙන ඇති අතර  මෙලෙස ආහාර ලබාදීමට ගිය නගර සභා සේවකයන් පිරිසකට පදික වේදිකාවේ කුඩා දරුවකු සිටිනු දැක නගරාධිපතිවරයා දැනුවත් කිරීමට පියවර ගෙන ඇත.

මේ අනුව එම ස්ථානයට පැමිණි එරංග සේනානායක මහතා  නගර සභාව සතු ගිලන්රථය ගෙන්වා  සිව් දිනක් වයසැති බිළිදා සමග යාචක 49 හැවිරිදි මවත් 57 හැවිරිදි පියාත් නගර සභාව සතු නිල නිවසක තාවකාලිකව නතර කිරීමට පියවර ගත්තේය.

මෙම සිදුවීම පිළිබඳව පුරපතිවරයා සදහන් කර සිටියේ පදික වේදිකාවේ දරුවකු සිටින බව සැලවූ වහාම එම ස්ථානයට ගොස් බිළිඳාට අවශ්‍ය ද්‍රව්‍ය මෙන්ම මවටද අවශ්‍ය දෑ සැපයීමට පියවර ගනිමින් තාවකාලිකව නවාතැනක් ලබාදීම සිදු කළ බවයි.