(අංජුල මහික වීරරත්න)

දේශගුණික විපර්යාස වල තීව්‍ර වන බලපෑම් මඟින් අවදානමට ලක්විය හැකි ශ්‍රී ලංකාවේ සහ ඉන්දියාවේ ප්‍රජාවගේ ඔරොත්තු දීමේ හැකියාව ශක්තිමත් කිරීම සඳහා වන කලාපීය ව්‍යාපෘතිය සඳහා වන ගිවිසුමට අත්සන් කිරීම සඳහා කැබිනට් අනුමැතිය ලැබී ඇත.

පරිසර, වන ජීවී, වන සම්පත්, ජල සම්පාදන, වැවිලි සහ ප්‍රජා යටිතල පහසුකම් අමාත්‍යාංශය, එක්සත් ජාතීන්ගේ ලෝක ආහාර වැඩසටහන සමඟ එක්ව දේශගුණික විපර්යාස වල තීව්‍ර වන බලපෑම් මඟින් අවදානමට ලක්විය හැකි ශ්‍රී ලංකාවේ සහ ඉන්දියාවේ ප්‍රජාවගේ ඔරොත්තු දීමේ හැකියාව ශක්තිමත් කිරීම සඳහා වන කලාපීය ව්‍යාපෘතියක් සඳහා වන යෝජනාවක් අනුහුරුවීමේ අරමුදල වෙත ඉදිරිපත් කර ඇති අතර ඒ සඳහා අනුහුරු වීමේ අරමුදල් මණ්ඩලයේ අනුමැතිය ලැබී තිබේ. 

යෝජිත ව්‍යාපෘතිය වසර 5 ක කාලසීමාවක් තුළ ක්‍රියාත්මක කරනු ලබන අතර ව්‍යාපෘතිය සඳහා ඇමෙරිකා ඩොලර් මිලියන 13ක පමණ මුල්‍ය ප්‍රදානයක් ශ්‍රී ලංකාව සහ ඉන්දියාව වෙත ලබා දෙනු ඇත.

ශ්‍රී ලංකාවේ මොනරාගල, ත්‍රිකුණාමලය, මන්නාරම, මුලතිව්, වවුනියාව කුරුණෑගල යන දිස්ත්‍රික්කයන්හි ව්‍යාපෘතිය ක්‍රියාත්මක කිරීමට නියමිතය. 

එම ව්‍යාපෘතිය ක්‍රියාත්මක කිරීම සඳහා වන අවබෝධතා ගිවිසුම ශ්‍රී ලංකාව සහ ලෝක ආහාර වැඩසටහන අතර අත්සන් තැබීම පිණිස පරිසර, වන ජීවී, වන සම්පත්, ජල සම්පාදන, වැවිලි සහ ප්‍රජා යටිතල පහසුකම් අමාත්‍යවරයා  ඉදිරිපත් කළ යෝජනාව අමාත්‍ය මණ්ඩලය විසින් අනුමත කරන ලදී.