ජනාධිපති මන්දිර පහක් නිවාඩු නිකේතන කරයි

(අංජුල මහික වීරරත්න)

නුවරඑළිය, අනුරාධපුර, මහියංගණය සහ කතරගම ප්‍රදේශ වල පිහිටි ජනාධිපති මන්දිර සහ අමාත්‍යවරුන්ගේ නිල නිවාස දෙස් විදෙස් සංචාරකයන් සඳහා සුව පහසු නිවාඩු නිකේතන ලෙස සංවර්ධනය කිරීමට ආයෝජනය කරන්නැයි ජනාධිපති අනුර කුමාර දිසානායක මහතා ව්‍යාපාරිකයන්ට ආරාධනා කළේය.

ඒ වෙනුවෙන් විධිමත් වැඩපිළිවෙළක් නුදුරේදීම ක්‍රියාවට නංවන බවද ජනාධිපතිවරයා ප්‍රකාශ කළේය.

ජනාධිපති අනුර දිසානායක මහතා මේ බව කීවේ සංචාරක ක්ෂේත්‍රයේ, පෞද්ගලික අංශයේ පාර්ශ්වකරුවන් සමඟ 2026 පූර්ව අයවැය සාකච්ඡාවකදීය.

ජනාධිපති කාර්යාලයේදී අද (29) පස්වරුවේ මෙම සාකච්ඡාව පැවැත්විණි.

2026 වසරේ සංචාරක ක්ෂේත්‍රයේ අපේක්ෂිත ඉලක්ක සපුරා ගැනීමේදී හුදෙක් ප්‍රවර්ධන වැඩසටහන් පමණක් ප්‍රමාණවත් නොවන බව කී ජනාධිපතිවරයා රාජ්‍ය සහ පෞද්ගලික අංශය ඒකාබද්ධ වූ නව උපාය මාර්ගික වැඩසටහනක් ක්‍රියාවට නැංවිය යුතු බව සඳහන් කළේය.

සංචාරක ක්ෂේත්‍රයේ කටයුතු කරගෙන යාමේදී දැනට පවතින අඩුපාඩු සහ අභියෝග පිළිබඳව ව්‍යාපාරිකයන් මෙහිදී ජනාධිපතිවරයාගේ අවධානයට ලක් කළ අතර, සංචාරක ක්ෂේත්‍රයේ උන්නතිය වෙනුවෙන් වූ යෝජනා ලබා දෙන ලෙස ජනාධිපතිවරයා මෙහිදී ව්‍යාපාරිකයන්ට ඇරයුම් කළේය.

මුදල් අමාත්‍යංශයේ ලේකම් ආචාර්ය හර්ෂණ සූරියප්පෙරුම, ජනාධිපති ජ්‍යෙෂ්ඨ ආර්ථික උපදේශක දුමින්ද හුලංගමුව, ජනාධිපති ජ්‍යෙෂ්ඨ අතිරේක ලේකම් රසල් අපොන්සු, ශ්‍රී ලංකා සංචාරක සංවර්ධන අධිකාරියේ සභාපති බුද්ධික හේවාවසම්, අපනයන සංවර්ධන මණ්ඩලයේ සභාපති මංගල විජේසිංහ මහත්වරු සහ පෞද්ගලික අංශයේ ව්‍යාපාරිකයෝ සහ පාර්ශ්වකරුවෝ පිරිසක් මෙම අවස්ථාවට එක්ව සිටියහ.

අදහස් (8)

ජනාධිපති මන්දිර පහක් නිවාඩු නිකේතන කරයි

විපරමා Friday, 29 August 2025 07:58 PM

ජනාදිපති මන්දිර හදලා,තමුන්ගේ සුක විහරණය පිණිස මහජන මුදල් කාබාසීනියා කෙරුවා මිසක් ජනතාවගේ යහපත වෙනුවෙන් කරපු දෙයක් නෑ.නූපන් දරුවන් පවා ලෝකෙටම ණයකාරයෝ කරලා ,ලන්කාව හිගාකන රටක් කරපු එකයි සිද්ද උනේ.

: 116 81

Perakum Friday, 29 August 2025 08:59 PM

විපරමා ඔබ හරි. ඒ වුණාට ඔවුන්ගේ රෙදි අපුල්ලන අමනයින්ට මේවා කොච්චර කිව්වත් තේරුම් ගන්න තරම් මොලයක් නෑ.

: 1 1

SabaFriday, 29 August 2025 09:19 PM

ඊට පස්සේ ආරක්ෂාව මදි කියනවා. ඊට පස්සේ හමින්බර්ඩ් හෝටලයේ නවතිනවා.

: 0 1

Nishan Saturday, 30 August 2025 06:23 AM

ආපු දවසේ ඉඳන් කරනවා කියනවා ලොක්කෝ හමිං බර්ඩ් විලා වල රෑ ගත කරනවා.

: 0 1

chinthana Saturday, 30 August 2025 08:18 AM

5ක් නෑ... හතරයි... 1 නුවරඑළිය 2 අනුරාධපුර 3 මහියංගණය 4 කතරගම

: 0 1

රිලාසිරි පඩුවස්නුවර Saturday, 30 August 2025 11:30 AM

අපි ආවොත් ඕව ආයෙම සුපිරි මන්දිර කරලා ජනාධිපති සහ හිතවත් අයට දෙනවා. මේ නිර්ප්‍රභූල දන්නේ නැහැ ප්‍රභූවරු වගේ ඉන්න හැටි.

: 1 0

fairoos Saturday, 30 August 2025 01:21 PM

ඒකනම් හොඳයි. ඕවා නඩත්තු කරනන් රජය කොච්චර වියදම් කරනවද?

: 1 0

SIRI Saturday, 30 August 2025 02:14 PM

අගේ කළ යුතු වැඩක්. ඒ වගේම ඕවා නිසි පරිදි පවත්වාගෙන යන්න පුළුවන් වැඩේ දන්න සුදුසුකම් ඇති පිරිසකට භාරදෙන එකත් වැදගත්.

: 0 0