(ගයාන් සූරිය ආරච්චි)

2007-2008 වර්ෂ වල නැගෙනහිර පළාතේ රාජ්‍ය නිලධාරීන් සහ සිවිල් පුද්ගලයන් පැහැරගෙන ගොස් ඝාතනය කිරීමේ සිද්ධියක් සම්බන්ධයෙන් ආධාර අනුබල දුන් බව කියන සැකකරුවන් දෙදෙනෙකු ඊයේ (29) අත්අඩංගුවට ගත් බව අපරාධ පරීක්‍ෂණ දෙපාර්තමේන්තුව පවසයි.

මෙසේ අත්අඩංගුවට ගෙන ඇත්තේ පොළොන්නරුව සහ පුදුකොලනි ප්‍රදේශයේ පදිංචි 33 සහ 39 වයස්වල පසු වන දෙදෙනෙකි.

2007-2008 වර්ෂ වල නැගෙනහිර පළාතේ අම්පාර දිස්ත්‍රික්කයේ සන්නද්ධ කණ්ඩායම් ක්‍රියාත්මක වී තිබූ බවත්  එහිදී රාජ්‍ය නිලධාරීන් පැහැර ගැනීම, අතුරුදන් කිරීම සහ පැහැරගෙන ගොස් පහරදී ඝාතනය කිරීම් සම්බන්ධයෙන් අපරාධ පරීක්ෂණ දෙපාර්තමේන්තුව කරනු ලබන විමර්ශන වලට අනුව එම සැකකරුවෝ විමර්ශන නිලධාරීන් විසින් අත්අඩංගුවට ගනු ලැබූහ.

අපරාධ පරීක්ෂණ දෙපාර්තමේන්තුවේ මනුෂ්‍ය ඝාතන හා සංවිධානාත්මක අපරාධ විමර්ශන අංශය වැඩිදුර  විමර්ශනන සිදුකරයි.