(රෝෂන් තුෂාර)

ජනමාධ්‍ය, සෞඛ්‍ය හා පරිසර අමාත්‍ය ධූරයන් දැරූ අවධියේ  සිය පුද්ගලික කාර්ය මණ්ඩලයට දේශපාලන හිතවතුන් 15දෙනෙකු  නාමිකව බඳවා ගනිමින්, එම සේවකයින්ට  වැටුප් හා අතිකාල දීමනා ලෙස  ගෙවූ රුපියල් ලක්ෂ අසූවක් අවභාවිතා කරමින් රජයේ මුදල්  සපරාදී සාවද්‍ය පරිහරණය කලේ යැයි කියන හිටපු අමාත්‍ය කෙහෙළිය රඹුක්වැල්ල මහතා  ඇතුළු සැකකරුවන්ට කොළඹ මහාධිකරණය හමුවේ අධි චෝදනා ගොනු කරන බව කොළඹ ප්‍රධාන මහේස්ත්‍රාත් අසංක එස් බෝදරගම මහතා හමුවේ කරුණු දැක්වූ අල්ලස් කොමිසම අද(10) පැවසීය.

හිටපු අමාත්‍ය කෙහෙළිය රඹුක්වැල්ල, අමාත්‍ය පුද්ගලික ලේකම්ව සිටි ඒ මහතාගේ පුත් රමිත් ලක්සෙන් බණ්ඩාර රඹුක්වැල්ල , දියණිය අමාළී නායනිකා රඹුක්වැල්ල හා නිවසේ සේවිකාව වූ ඇඹිලිපිටිය ප්‍රදේශයේ පදිංචිකාරියක වන රාජපක්ෂ සුඛයිං පතිරණගේ නිපුනි ක්‍රිෂ්ණජිනා සැකකරුවන්ට මෙසේ අධි චෝදනා ගොනු කරන බව අල්ලස් කොමිසම වැඩිදුරටත් පැවසීය .

මෙම පැමිණිල්ලේ තුන්වෙනි සැකකරු ලෙස නම්කර සිටි රඹුක්වැල්ල මහතාගේ සම්බන්ධීකරණ ලේකම්වරයෙකු වූ නිශාන්ත බණ්ඩාර බස්නායක රජයේ සාක්කිකරුවකු ලෙස නම් කිරීමට නියමිත බවද සඳහන් කළේය.

නිශාන්ත බණ්ඩාර බස්නායක සැකකරු රජයේ සාක්ෂිකරුවකු ලෙස නම් කරන බවට ඉදිරිපත් කළ කරුණු සලකා බැලූ ප්‍රධාන මහේස්ත්‍රාත්වරයා බස්නායක මහතා නඩුවෙන් මුදා හැරීමට නියෝග කළේය.

සැකකරුවන් අධිකරණයේ පෙනී සිටීමෙන් අනතුරුව අල්ලස් කොමිෂම ඉදිරිපත් කළ කරුණු සලකා බැලීමෙන් පසුව මහේස්ත්‍රාත්වරයා  මෙම නියෝග නිකුත් කළේය.

සැකකරුවන්ට එරෙහිව අල්ලස් පනතේ 70වෙන වගන්තිය යටතේ පවරා ඇති පැමිණිලි තුනෙහි විමර්ශන අවසන් අවසන් කර අධි චෝදනා ගොනු කිරීමට කටයුතු කරන බව අල්ලස් කොමිසම වැඩිදුරටත් පැවසීය.

කරුණු සලකා බැලූ ප්‍රධාන මහේස්ත්‍රාත්වරයා තුන්වෙනි සැකකරු නඩුවෙන් මුදාහැර අධි චෝදනා ගොනු කිරීම සම්බන්ධයෙන් කරුණු ජනවාරි 16 දින අධිකරණයට ඉදිරිපත් කරන ලෙසට අල්ලස් කොමිසමට නියෝග කළේය.