(අංජුල මහික වීරරත්න)

කුරුණෑගල ශික්ෂණ රෝහලේ හෘද හා උරස් ශල්‍යකර්ම සේවාව කඩිනමින් ආරම්භ කිරීමට පියවර ගන්නැයි සෞඛ්‍ය අමාත්‍යංශයේ ලේකම් විශේෂඥ වෛද්‍ය පාලිත මහීපාල මහතා නිලධාරීන්ට උපදෙස් ලබා දුන්නේය.

සෞඛ්‍ය ලේකම්වරයා එම උපදෙස් ලබා දුන්නේ එම රෝහලේ වත්මන් තත්ත්වය පිළිබදව සොයා බැලීම සදහා සිදුකරන ලද නිරීක්ෂණ චාරිකාවකින් අනතුරුවයි.

කුරුණෑගල ශික්ෂණ රෝහලේ හෘද හා උරස් ශල්‍යකර්ම සේවාව ආරම්භ කිරීම සදහා එම ඒකකයට අවශ්‍ය වන ‍ ගොඩනැගිලි ශල්‍ය උපකරණ මෙන්ම අනෙකුත් වෛද්‍ය උපකරණ මේ වන විට ස්ථාපිත කරමින් පවතින බවත් රෝහලට අවශ්‍ය හෘද ශල්‍ය විශේෂඥ වෛද්‍යවරයෙක්ද මේ වන විට රෝහලට අනුයුක්ත කිරීමට සෞඛ්‍ය අමාත්‍යාංශය පියවර ගෙන තිබෙන බවත් අමාත්‍යංශය පවසයි. මෙම ඒකකය දැඩි සත්කාර ඇදන් (ICU Beds) 06 කින්ද, ඉහල යැපුම් ඒකක (HDU Beds) ඇදන් දෙකකින්ද සමන්විත වේ. ශල්‍යාගාරය අති නවීන වෛද්‍ය උපකරණවලින් සමන්විත වන අතර, ශල්‍ය ඇදන් දෙකකින් ද සමන්විත වේ. මෙහි එකවර ශල්‍යකර්ම දෙකක් සිදු කිරීමේ නවීන පහසුකම්වලින් සමන්විත වන අතර, මෙහි පිරිමි හා කාන්තා ලෙස හෘද ප්‍රතිකාර වාට්ටු දෙකක් ස්ථාපිත කිරීමට පියවර ගෙන ඇත. එහි ඇදන් ධාරිතාවය 40 කි.