(බිමල් ශ්‍යාමන් ජයසිංහ)

කඩු පොලු අතැතිව සුඛෝපභෝගී ජීප් රථයකින් පැමිණි තිදෙනකු තියුණු ආයුධ සහ හොරයින් මත්කුඩු සමග  අත්අඩංගුවට ගැනීමට හැකි වූ බව කඩුවෙල පොලිසිය සඳහන් කරයි.

සැකකරුවන් සන්තකයේ තිබී වක් පිහියක් , කඩු තුනක් ,සහ හොරයින් මත්කුඩු ග්‍රෑම් පහක් පොලිසිය භාරයට ගෙන ඇත.

කඩුවෙල පොලිසියේ ස්ථානාධිපති පොලිස් පරීක්ෂක කාන් වීරසිංහ මහතා කඩුවෙල රංකඩු පත්තිනි දේවාලයේ වාර්ෂික දේව ප්‍රතිමා ප්‍රදර්ශනය උත්සව පෙරහරේ රාජකාරී නිමවා ගුවන් විදුලි මෝටර් රථයෙන් යළි පොලිස් ස්ථානය වෙත පැමිණෙමින් සිටියදී කඩුවෙල නගරයේ ඉන්ධන හලක් ඉදිරිපිට නැවතු සුඛෝපභෝගී ජීප් රථයකින් පුද්ගලයන් කිහිපදෙනකු තියුණු ආයුද අත දරාගෙන කඩිමුඩියේ එයින් බිමට දැක ඇත.

පොලිස් ගුවන් විදුලි මෝටර් රථය දුටු එම පිරිස ආපසු හැරී ඔවුන් පැමිණි ජීප් රථය වෙත දිව ගොස් එයට නැගීමත් සමගම වහා ක්‍රියාත්මක වූ ස්ථානාධිපතිවරයා මෝටර් රථයෙන් බැස පිස්තෝල ජීප් රථය වෙත එල්ල කර එය නවතන ලෙස අණ දී ඇත. පොලිස් අණ නොතකා ඔවුන් පළා යාමට සූදානම් වීමේදී ජීප් රථයේ රෝදවලට වෙඩි ප්‍රහාර එල්ල කර ඇතත් එම පිරිස වෙඩි පහර මධ්‍යයේම ජිප් රථයෙන් මීටර් 800 පමණ දුරකට ගොස් අතුරු මාර්ගයක වාහනය නවතා පලා යාමට උත්සහ කළ අවස්ථාවේ සැකකරුවන් තිදෙනකු අත්අඩංගුවට ගෙන ඇත.

එම අවස්ථාවේදී පළා ගිය සැකකරු සොයා විශේෂ පොලිස් කණ්ඩායමක් යොදා ඇතැයි ස්ථානාධිපති වරයා පැවසීය

අත්අඩංගුවට ගත් සැකකරුවන් රණාල සහ කඩුවෙල පදිංචි වයස අවුරුදු 26 හා 38 අතර පසුවන්නන්ය.

මත්ද්‍රව්‍ය ජාවාරමේ යෙදෙන එම සැකකරුවන්ගෙන් දෙදෙනකු බන්ධනාගාර ගතව සිට මෑතකදී ඇප මත නිදහස්ව පැමිණි පුද්ගලයන් බවත් දර්ශනවලදී අනාවරණය වූ බව කඩුවෙල පොලිසිය කියයි. 

සැකකරුවන් සියලුම දෙනා කඩුවෙල අධිකරණ වෙත ඉදිරිපත් කිරීමට නියමිතය