(සිතුම් චතුරංග)

යුද්ධයෙන් මියගිය දෙමළ ජනතාව සිහිකරමින් උතුරු පළාතේ ස්ථාන කිහිපයක මහවිරු සැමරුම් වැඩසටහන් කිහිපයක් ඊයේ (27) සවස පැවැත්වීය.

මුලතිව්,යාපනය,මන්නාරම,කිලිනොච්චිය හා වවුනියාව දිස්ත්‍රික්කයේ ස්ථාන කිහිපයක පහන් දල්වා එලෙස මහවිරු සැමරුම් වැඩසටහන් පැවැත්වූ අතර පහන් දල්වමින් මියගිය ඥාතීන් සිහිකිරීම එහිදී සිදුවිය.

අධිකරණ නියෝග හේතුවෙන් උතුරු පළාත නියෝජනය කරන දෙමළ දේශාපාලන පක්ෂ නියෝජිතයින්ද සිය නිවෙස් හා කාර්යාල තුළදි යුද්ධයේ මියගිය ජනතාව සිහිකිරීමට කටයුතු කෙරිණි.

පාර්ලිමේන්තු මන්ත්‍රී ගජේන්ද්‍රකුමාර් පොන්නම්බලම් මහතා නායකත්වය දරන දෙමළ ජාතික ජනතා පෙරමුණේ නීති උපදේශක කනගරත්නම් සුභාෂ් මහතා යාපනය චාට්ටි ප්‍රදේශයේ මහවිරු සොහොනක්තුල මියගිය පුද්ගලයින් සිහිකිරීමට වැඩසටහනක් සංවිධානය කිරීම හේතුවෙන් ආරක්ෂක අංශ හා එම පක්ෂ ක්‍රියාකාරීන් අතර දැඩි උණුසුම් තත්වයක් හටගත් අතර පොලිසිය මැදිහත්ව එය වැලැක්වීමට පියවරගනු ලැබීය.

යාපනය වැල්වැටිතුරෙයි හා  මුලතිව් , මුල්ලිවයික්කාල් හි මහවිරු සැමරුම් පැවැත්වීමට ගිය එම්.කේ.සිවාජිලිංගම් මහතා ඇතුළු විශාල පිරිසක් ආරක්ෂක අංශ විසින් නැවත හරවා යැවීමට කටයුතු කළ බවත් එම වැඩසටහන් සංවිධායකයින් පවසති.

යුද්ධයෙන් මියගිය එල් ටි ටි සාමාජිකයින් සැමරීමේ මහවිරු සැමරුම සෑම වසරකම නොවැම්බර් මස 27 වැනිදා සවස 6.05 ට පැවැත්වීම සම්ප්‍රධාය වන අතර එල්.ටි.ටි.ඊ සංවිධානය ක්‍රියාකාරීව පැවැති අවධියේ උතුරු පළාතේ පිහිටි මහවිරු සොහොන් ආශ්‍රිතව එවකට එල්.ටි.ටි.ඊ නායකයින්ගේ ප්‍රධානත්වයෙන් මහවිරු සැමරුම් පැවැත්වූහ.

 යුද ගැටුම්වලින් 1982 නොවැම්බර් 27 වැනිදා මියගිය එල් ටි ටි ක්‍රියාකාරියෙකු වු ලුතිනන් සංකර් නමැත්තා සිහි කරමින් නොවැම්බර් 27 වැනිදා මහවිරු සැමරුම පැවැත්වීම ආරම්භ කොට ඇති අතර, 1989 නොවැම්බර් 27 වැනිදා මුලතිව් කැළැවේ නිත්තකෙයිකුලම ප්‍රදේශයේ පළමු මහවිරු සැමරුම් වැඩසටහන පවත්වා තිබේ.

මහවිරු සැමරුම් පැවැත්වීම වළක්වාලමින් උතුරු පළාතේ වවුනියාව , මුලතිව් , කිලිනොච්චිය , යාපනය හා මන්නාරම දිස්ත්‍රික්කයන් හි පොලිස් ස්ථාන විසින්  එම වැඩසටහන් සඳහා වාරණ නියෝගයන් කිහිපයක් ලබාගෙන තිබුණි.