(අන්තර්ජාලය ඇසුරෙන් විමුක්ති එස් රුද්‍රිගු)

ඇමෙරිකාවේ ඇලබාමා ප්‍රාන්තයේ කුඩා නගරයක යෝධ රේඩියෝ කුළුණක් කිසිඳු සාක්ෂියක් නොමැතිව අතුරුදන් වී ඇත.

ඩබ්ලිව්.ජේ.එල්.එක්ස් ප්‍රාදේශීය රේඩියෝවට අයත් මෙම කුළුණ අතුරුදන් වීම හේතුවෙන් ජැස්පර් නගරය සහ ඒ අවට ප්‍රදේශයේ විකාශන කටයුතු නවතා දැමීමට එම රේඩියෝ නාලිකාවට සිදු වූවේය.

අඩි 200 ක් උස මෙම රේඩියෝ කුළුණ සොරෙකු හෝ සොරුන් කණ්ඩායමක් විසින් සොරකම් කරනු ලැබ ඇතැයි විශ්වාස කරන බව එම රේඩියෝ නාලිකාවේ සාමාන්‍යාධිකාරී බ්‍රෙට් එල්මෝර් මහතා ප්‍රකාශ කළේය.රේඩියෝ නාලිකාවේ විකාශන කටයුතු නවතා දැමීමට සිදු වීම විශාල පාඩුවක් බවත් ඉන් ජැස්පර් ප්‍රජාවට සිය හඬ අහිමි වී ඇති බවත් සාමාන්‍යාධිකාරීවරයා පැවැසුවේය.

පසුගිය 2 වැනිදා කුළුණේ නඩත්තු කටයුතු සඳහා නඩත්තු කණ්ඩායමක් කුළුණ පිහිටි ප්‍රදේශයට ගිය අවස්ථාවේ එම ස්ථානයේ කුළුණක් නොමැති බව දැක පුදුමයට පත් වී ඇති බව එල්මෝර් මහතා ප්‍රකාශ කළේය.එම අවස්ථාවේදී කුළුණ අසල ඇති ගොඩනැගිල්ලේ තිබූ විකාශන උපකරණ සියල්ලද අතුරුදන් වී ඇති බව නඩත්තු කණ්ඩායමේ අවධානයට යොමුව ඇතැයි ඔහු පැවැසුවේය.

අවම වශයෙන් රේඩියෝ කුළුණ ඉතිරිකර යාමට සොරුන්ට යුතුකමක් තිබූ බවත් රේඩියෝ කුළුණක් ආදේශ කිරීමට විශාල මුදලක් වැයවන බවත්  සාමාන්‍යාධිකාරීවරයා සොරකම පිළිබඳ අදහස් දක්වමින් ප්‍රකාශ කළේය.තවමත් මෙම සොරකම කළ සොරුන් අත් අඩංගුවට ගැනීමට පොලිසිය සමත්වී නැති බවද ඔහු පැවැසුවේය.