(නිමල කොඩිතුවක්කු
 
අඩු මිලකට දඹදිව සංචාර සංවිධානය කරන සංවිධායකයන්ගෙන් සංචාරකයන් ප්‍රවේශම් විය යුතු බව ශ්‍රී ලංකා විදේශ බෞද්ධ  වන්දනා ගමන් සංවිධායකයන්ගේ සංගමයේ ලේකම් රංගනාත් කරුණාදාස මහතා පැවැසීය. 

දිනෙන් දින ඉහළ යන මිල ගණන්  සමඟ වර්තමානයේ  දඹදිව සංචාරක කර්මාන්තය දැඩි අර්බුදයකට පත්ව ඇති බවද ඔහු සඳහන් කළේය.   

ශ්‍රී ලංකා බෞද්ධ වන්දනා ගමන් සංවිධායකයන්ගේ සංගමයේ ලේකම් රංගනාත් කරුණාදාස මහතා ඒ බව සඳහන් කළේ ව්‍යාජ සංවිධායකයන් නිසා දඹදිව වන්දනා චාරිකාවේ නිරත බැතිමතුන්ට මුහුණදීමට  සිදුවී තිබෙන ගැටලුකාරී තත්ත්වයන් පිළිබඳ  දැනුවත් කිරීම සඳහා කොළඹ ජායික් හිල්ටන් හෝටලයේ  පැවති මාධ්‍ය හමුවකදීය.       

                                  
ගුවන් ටිකට්පත්වල මිල ඉහළ අගයක් ගැනීම, ඇමරිකානු ඩොලරයේ මිල ඉහළ යෑම තුළ ඉන්දියාවේ සංචාරක ගමන් සංවිධානය කිරීමේ පිරිවැය ඉහළ යෑම මෙම තත්ත්වයට මූලිකව බලපා ඇතැයිද කරුණාදාස මහතා සඳහන් කළේය.     

           
මෙවැනි තත්වයක් තිබියදී ඇතැම් ව්‍යාජ සංවිධාන අඩුමිලට දඹදිව සංචාර සූදානම් කරන බව පවසා ග්‍රාමීය මට්ටමේ ජනතාව මුලා කරමින් සිටින බවද හෙතෙම කීය.     

 ඔවුන්ට රැවටුණු ජනතාව ඉන්දියාවේදී ගැටලු රැසකට මුහුණ දෙන බවත්, මේ හේතුවෙන් එම කර්මාන්තය පවත්වාගෙන යාම අසීරු වී ඇති බවත් පැවසීය.   

                
ජනතාව මුලා කරමින් ඇතැම් ව්‍යාජ සංවිධාන අඩු මිලට දඹදිව වන්දනා ගමන් සංවිධාන කරන බවට තම සංගමයට තොරතුරු ලැබී ඇති බව එම මාධ්‍ය හමුවට එක්වෙමින් සංගමයේ සභාපති රෝහිත සිරිවර්ධන මහතා සඳහන් කළේය.         

            
මෙම තත්ත්වය සැලකිල්ලට ගනිමින්  දඹදිව වන්දනාවේ යන බැතිමතුන් වෙනුවෙන් විශේෂ සහන මිලකට ගුවන් ටිකට්පත් ලබාගත හැකි ක්‍රමවේදයක්  සකස් කරදෙන ලෙස  තම සංගමය ජනාධිපතිවරයාගෙන් සහ අගමැතිවරයාගෙන් ඉල්ලා සිටින  බවද හෙතෙම පැවසීය.     

                                    
මෙම මාධ්‍ය හමුව සඳහා එම සංගමයේ භාණ්ඩාගාරික ජයසිරි කෝට්ටේගොඩ, ප්‍රධාන සංවිධායක හර්බට් විජේතුංග, ප්‍රචාරක ලේකම් සමීර බණ්ඩාර යන මහත්වරු ඇතුළු පිරිසක් සහභාගී වූහ.