(සුජිත් හේවාජුලිගේ සහ අංජුල මහික වීරරත්න)

අධිකරණ ඇමති හර්ෂණ නානායක්කාර මහතා  අසභ්‍ය අභිනයක් කිරීමෙන් තමන්ගේ වරප්‍රසාද කඩවුණ බවට සඳහන් කරමින් ඉදිරිපත් කෙරුණු වරප්‍රසාද ප්‍රශ්නය ඉවත් කරගන්නා බව සමගි ජන බලවේගයේ කළුතර දිස්ත්‍රික් මන්ත්‍රී නීතිඥ අජිත් පී පෙරේරා මහතා පාර්ලිමේන්තුවේදී අද පැවසීය.

අජිත් පී පෙරේරා මහතා මෙසේද පැවසීය

අධිකරණ ඇමතිතුමා අසභ්‍ය අභිනයක් කිරීමෙන් මගේ වරප්‍රසාද කඩවීම  හේතුවෙන්  මේ  යෝජනාව ඉදිරිපත් කළා. මගේ පැරණි මිත්‍රයාට   සමාව දෙන්න තීරණය කළා. මම ඔහුට  මෛත්‍රී කරනවා. සමාව දීම දේව ගතියක් කියලා අපේ මවුපියන් වැඩිහිටියන් උගන්වල තියෙනවා.

එතුමා අතින් වරදක් සිද්ධ වුණත් ඒ ගැන අහිතක් නැහැ. මේ වරප්‍රසාද ප්‍රශ්නය  ඉස්සරහට ගෙනියන්නේ නෑ.මොකද මේ ක්‍රියාදාමය තුළ   එතුමාට පෞද්ගලිකව අගතියක් සිද්ධ වෙන්න පුළුවන් .