කොරෝනා වයිරසය ආසාදිතයන් හෝ එසේ සැක කරන්නන් සමග විවෘතව රාජකාරි කිරීම නිසා තමන්ගේ සේවයෙන් පසුව නිවෙස් වලට යා නොහැකි අයට අවශ්‍ය නිරෝධායන කටයුතු සඳහා නවාතැන් දීමට ශ්‍රී ලංකා හෝටල්කරුවන්ගේ සංගමය කැමැත්ත පලකර තිබේ.

කොරෝනා වයිරසය පැතිරීම මැඬපැවැත්වීම සඳහා රජය විසින් ගනු ලබන ක්‍රියාමාර්ග දෙස මහත් අගයකිීරීමෙන් බලා සිටින ශ්‍රී ලංකා හෝටල්කරුවන්ගේ සංගමය ඊට සහයෝගය දීමට කැමැත්ත පළකරමින් නිවේදනයක් නිකුත් කර තිබේ. ඒ අනුව තමන්ගේ සංගමයට අයත් සාමාජිකයන්ගේ තෝරාගත් හෝටල කිහිපයක් නිරෝධායන මධ්‍යස්ථාන ලෙස පවත්වාගෙන යාමට කැමැත්ත පළකර තිබේ.

විශේෂයෙන්ම කොරෝනා වයිරසය සමගින් කටයුතු කරන වෛද්‍ය කණ්ඩායම් වලට අවශ්‍ය නිරෝධායන කටයුතු වෙනුවෙන් තමන්ගේ හෝටල් කාමර වෙන් කිරීමටද ශ්‍රී ලංකා හෝටල්කරුවන්ගේ සංගමය කැමැත්ත පලකර තිබේ. මෙම කටයුතු වල නිරත වන වෛද්‍ය කණ්ඩායම් වලට තමන්ගේ සේවාමුරය නිමවීමෙන් පසුව නිවෙස් වලට යාමට නොහැකිය.

නිරෝධායන කටයුතු සඳහා නිදහස් කෙරෙන කාමර සංඛ්‍යාව එහි අවශ්‍යතාව මත තීරණය කෙරේ. ශ්‍රී ලංකා හෝටල්කරුවන්ගේ සංගමය සිය නිවේදනයෙන් වැඩිදුරටත් ප්‍රකාශ කරන්නේ මෙම අවස්ථාවේදී කොවිඞ් - 18 වයිරසය සමග සටන් වදින ප්‍රජාව, විශේෂයෙන්ම සෞඛ්‍ය කාර්ය මණ්ඩලයේ කාර්යභාරය ඉතාම ඉහළින් අගයන බවයි.