(සුජිත් හේවාජුලිගේ)

හිටපු අමාත්‍යවරයකු අමාත්‍යාංශ හිටපු අතිරේක ලේකම්වරයකු ඇතුළු නිලධාරීන් පිරිසකගේ විදේශ ගමන් වෙනුවෙන්  2020 වර්ෂයේදී වැය කළ  රුපියල් පහළොස් ලක්ෂයකට වැඩි මුදලක් තේ මණ්ඩලය වැවිලි අමාත්‍යාංශයෙන්  අයකර ගැනීමට 2021 වර්ෂය වනවිටත්  කටයුතු කර නොතිබූ බව ජාතික විගණන කාර්යාලය නිකුත් කළ වාර්තාවක සඳහන් වේ.

මේ අතර ගෝලීය තේ සංග්‍රහය වෙනුවෙන් තේ මණ්ඩලය  විදේශ තානාපති කාර්යාලවලට 2017 වර්ෂයේදී  දුන්  රුපියල් පන් කෝටියකට වැඩි මුදලින් රටවල් 15ක ඉතිරිවූ රුපියල් දහ අට ලක්ෂයක පමණ මුදල 2020 වර්ෂය වනවිටත් අය කරගෙන නොතිබූ බව එම වාර්තාවේ දැක්වේ.

විදේශ සංචාරවල යෙදුණු එම  පිරිසට  කුඩා තේ වතු සංවර්ධන අධිකාරිය, සීමාසහිත කළුබෝවිටියාන   තේ කර්මාන්තශාලාව සහ වැවිලි අමාත්‍යාංශය යන ආයතනයන්හි නිලධාරීහුද  ඇතුළත් වූහ.

කුඩා තේ වතු සංවර්ධන අධිකාරිය සීමාසහිත කළුබෝවිටියාන තේ  කර්මාන්ත ශාලාව  සහ වැවිලි අමාත්‍යාංශය යන ආයතනයන්හි නිලධාරීන්ගේ විදේශ ගමන් වියදම් වෙනුවෙන් දැරූ රුපියල් හය ලක්ෂයකට වැඩි මුදල  මූල්‍ය  ප්‍රකාශනයෙහි දක්වා ඇතත් විගණන දිනය වනවිටත්  එම මුදල් අයකර ගැනීමට කටයුතු කරනු තිබූ බවද  වාර්තාවේ දැක්වේ.

මේ අතර  තේ මණ්ඩලය හිටපු අධ්‍යක්ෂවරයකු  තේ ප්‍රචාරණ වෘත්තීය උපදේශකවරයකු ලෙස  අමාත්‍ය මණ්ඩල අනුමැතියකින් තොරව 2020 වර්ෂයේ සිට  බඳවාගෙන දීමනා  වශයෙන් රුපියල් දහ අට ලක්ෂයකට වැඩි මුදලක් ගෙවා ඇතැයි විගණන  නිලධාරීහු පෙන්වා දෙති.

මේ තොරතුරු සඳහන්ව ඇත්තේ  ශ්‍රී ලංකා තේ මණ්ඩලයේ 2020 වාර්ෂික වාර්තාවට ඇතුළත් කරනු ලැබ ඇති විගණන වාර්තාවේය.