සුපිරි "ඛාන්" නළුවෙකු නොවුණද බොලිවුඩයේ ජනප්‍රියතම නළුවන් අතරේ හිණිපෙත්තේම සිටින සායිෆ් අලී ඛාන් පිළිබඳව පසුගිය කාලයේ නොයෙකුත් මාතෘකා ඔස්සේ තොරතුරු වාර්තා වුණා. මේ දිනවල ඔහු සිය දකුණු අතේ මැදඇඟිල්ලේ ශල්‍යකර්මයකට මුහුණදී සිටින බවට තොරතුරු ලැබෙනවා. ඔහු මෙසේ ශල්‍යකර්මයකට මුහුණ දී ඇත්තේ ඔහු රංගනයෙන් දායක වන අලුත්ම චිත්‍රපටය වූ "රැන්ගොන්"හි රූපගත කිරීමක් අතරතුරදී සිදුවු අනතුරක් නිසාවෙන් බව සඳහන්.

මෙම ශල්‍යකර්මය මුම්බායි නගරයේ පිහිටි "කෝකිලා අම්බානි" පෞද්ගලික රෝහලේ සිදුකර ඇති අතර, සති කිහිපයක් ඔහුට මේ වෙනුවෙන් විවේකීව සිටීමට වෛද්‍යවරුන්ගේ උපදෙස් ලැබී තිබෙන බවද වාර්තා වෙනවා. පසුගියදා ප්‍රංශයේ "මැඩ්රිඩ්" නගරයේ පැවැති "අයිෆා" සිනමා සම්මාන උලෙළටද සායිෆ්ට මෙම කාරණය නිසාවෙන් සහභාගී වීමට නොහැකි වුණා.