ආණ්ඩුක්‍රම ව්‍යවස්ථාවේ රටේ ඒකීයභාවය, බුද්ධාගමට ඇති ප්‍රමුඛස්ථානය ආදිය වෙනස් කිරීමට ගොස් නැති ප්‍රශ්න ඇති කරන්නේ නැතැව මැතිවරණ ක්‍රමය පමණක් වෙනස් කරන්නැයි රජයට දැනුම් දෙන බව ජාතික හෙළ උරුමයේ මාධ්‍ය ප්‍රකාශක බස්නාහිර පළාත් සභා මන්ත්‍රී නිශාන්ත ශ්‍රී වර්ණසිංහ මහතා පැවසීය.

ව්‍යවස්ථාවේ සංශෝධනයක් මගින් බලය බෙදීමක් ආදිය ගැන කතා කරන්නට ගියහොත් රට පඹ ගාලක පැටලෙනු ඇති බවට ජාතික හෙළ උරුමය අනතුරු අඟවන බවද වර්ණසිංහ මහතා කීවේය.

නව ව්‍යවස්ථාවක් සම්බන්ධයෙන් මහජන අදහස් විමසීම සඳහා පත් කළ කමිටුවේ වාර්තාවේ ඇති ඇතැම් නිර්දේශ ගැන කතා කරමින් සමහරුන් ජනතාවට බොරු බිල්ලන් මවමින් සිටින බව කී මන්ත්‍රීවරයා කිසිවෙක් හෝ අතිශයෝක්තියෙන්, ආවේගශීලීව යමක් කී පමණින් එය ඇත්ත නොවන බව ජනතාව ද තේරුම් ගත යුතු යැයි ප්‍රකාශ කළේය.

එම වාර්තාවේ ඇත්තේ ජනතාවගේ අදහස් ඇසුරින් ඉදිරිපත් කළ නිර්දේශ බවත් එහි එම නිර්දේශ අතුරින් තමන්ට වාසිදායක නිර්දේශයන ගැන පමණක් ඒකාබද්ධ විපක්ෂයේ අය කතා කරන බවත් මන්ත්‍රීවරයා කීවේය.

නිශාන්ත ශ්‍රී වර්ණසිංහ මහතා මේ බව පැවසුවේ බත්තරමුල්ල, පන්නිපිටිය පාරේ පිහිටි ජාතික හෙළ උරුම මූලස්ථානයේ දී අද (12) පැවති මාධ්‍ය හමුවක් අමතමිනි.