(සුජිත් හේවාජුලිගේ සහ නිමන්ති රණසිංහ )

සමෘද්ධි බැංකු සහ බැංකු සමිතිවල  සිදුවී ඇතැයි පැවසෙන වංචා 107 කින්  කෝටි විසි තුනකට වැඩි පාඩුවක් සිදුව ඇතැයි ජාතික විගණන කාර්යාලය නිකුත් කළ අලුත්ම වාර්තාවක සඳහන් වේ.

මේ වසරේ අප්‍රේල් මස 21දා විගණනයට ඉදිරිපත් කෙරුණු වාර්තා අනුව 2014 - 18 කාල පරිච්ඡේදයේදී සිදුව ඇතැයි කියන  වංචා 15 කින්  රුපියල් කෝටි හයකට වැඩි මුදලක්ද 2019 සිට 2023 පෙබරවාරි දක්වා සිදුවී ඇතැයි කියන වංචා  92 කින්  රුපියල් කෝටි 17ට වැඩි මුදලක්ද පාඩු වී ඇතැයි ජාතික විගණන කාර්යාලය පවසයි.

ගනුදෙනුකරුවන්ගේ කටයුතු අතින්  කිරීමේදී  සිතාමතාම කරන වැරදි සහ මූල්‍ය වංචා අවම කර කරගැනීමට අපේක්ෂා කළද  එම වංචාවල අඩුවක්වී නැතැයි එම වාර්තාවේ දැක්වේ.

දෙපාර්තමේන්තුවට මෘදුකාංගයක් මිලදී ගැනීම ඇතුළුව ඊ පුවත්පත එළිදැක්වීම සඳහා රුපියල් ලක්ෂ 77 කට වැඩි මුදලක් වියදම් කර  ඇතත් ඉන් සාර්ථක ප්‍රතිඵල අත්ව නැතැයි පවසන විගණන වාර්තාව ඊ පුවත්පත  පරිශීලනය කරන සංඛ්‍යාව 56234 ක් ලෙස පැවතුණු බවද  සඳහන් කළේය.

ඊ පුවත්පත දුරකථන යෙදවුම  භාවිතා කරන ප්‍රමාණය 21565 ක්වූ අතර එය මුළු සමෘද්ධිලාභීන්ගෙන් සියයට හතරක් ලෙස පහළ මට්ටමක පැවතුණු බවද  වාර්තාව සඳහන් කරයි.

මේ අතර සුව බොජුන් හල් හතරක් ඉදිරි කිරීම සඳහා 2020 හා 2021 වර්ෂවලදී  රුපියල් කෝටි දෙකකට ආසන්න මුදලක් වැය කර ඇතත් මේ වසරේ මාර්තු දක්වාම එම  අලෙවිහල් විවෘත කිරීමට නොහැකිව තිබූ බවද  විගණන වාර්තාව සඳහන් කළේය.

මේ තොරතුරු සඳහන් වන්නේ සමෘද්ධි සංවර්ධන දෙපාර්තමේන්තුවේ 2022 වාර්ෂික වාර්තාවට ඇතුළත් කරනු ලැබ ඇති විගණන වාර්තාවේය. මෙම වාර්තාව පාර්ලිමේන්තුවට පසුගියදා  ඉදිරිපත් කෙරිණ.