සැප්තැම්බර් 02 වැනිදා බොලිවුඩ්හි තිරගත වන 'අකීරා' චිත්‍රපටයේ ප්‍රධාන භූමිකාවට පණ පොවන සොනක්ෂි සින්හා බොලිවුඩයේ ජනප්‍රියතම යොවුන් නළුවන් දෙදෙනෙකු වන රන්වීර් සිං හා රන්වීර් කපූර් දෙදෙනා ප්‍රධාන නළු චරිත පණ පොවන බොලිවුඩ් චිත්‍රපට දෙකක් සඳහා එක්වීමට අකමැත්ත පළ කර තිබෙන බව 'ලයිෆ් ඔෆ් බොලිවුඩ්' වෙබ් අඩවිය සඳහන් කරනවා.

කෙසේ වෙතත්, සොනක්ෂි මෙසේ මොවුන් පෙනී සිටින චිත්‍රපට සඳහා එක්වීමට අකමැත්ත පළ කර ඇත්තේ ඔවුන් සමග විරසක වීමක් නිසා නොවන අතර, ඇයට මෙම චිත්‍රපට රූපගත කරන කාලය තුළ අර්බාස් ඛාන්ගේ 'ඩබාන්ග්' තුන්වැනි චිත්‍රපටයේ රූපගත කිරීම් කටයුතු යෙදී තිබීම නිසා බව සඳහන්.

ඇය මීට පෙර රන්වීර් සිං සමග 'ලුටෙරා' චිත්‍රපටයේ රඟපා තිබුණද ඇය රන්බීර් කපූර් සමගින් තවමත් චිත්‍රපටයක රංගනයෙන් දායක වී නෑ. ලැබෙන තොරතුරුවලට අනුව ඇයට 'ඩබාන්ග්' චිත්‍රපටයේ පමණක් නොවන මෙවර රියෝ ඔලිම්පික් තරගාවලියේදී රිදී පදක්කමක් දිනාගත් බැඩ්මින්ටන් ක්‍රීඩිකා PV සින්දුගේ ජීවිත කතාව අලළා නිර්මාණය කරන චිත්‍රපටයේ රූපගත කිරීම් කටයුතු මෙම කාලසීමාවේදී යෙදී තිබෙන බවද සඳහන්. ඇය මෙම චිත්‍රපටයේ PV සින්දුගේ චරිතය නිරූපණය කරනු ලබනවා.