(අංජුල මහික වීරරත්න)

ලන්දේසි පාලන සමයේ දී (1640-1796) ශ්‍රී ලංකාවෙි සිට ඕලන්දයට (නෙදර්ලන්තය) රැගෙන ගිය මිල කළ නොහැකි පෞරාණික අවි ආයුධ හයක් නැවත ශ්‍රී ලංකාවට ලබාදීමට නෙදර්ලන්ත රජය පොරොන්දු වී තිබේ.

පාරම්පරික සිංහල කැටයම් සහිත කාලතුවක්කුවක්,ලෙව්කේ දිසාවෙිට අයත් දියමන්ති එබ්බවූ කඩු කස්තාන ඇතුළු අවි ආයුධ ද මෙම පුරාවස්තු අතරට අයත් වේ.

ජාතික ආරක්ෂාව පිළිබඳ ජනාධිපති උපදේශක,ජනාධිපති කාර්ය මණ්ඩල ප්‍රධානී සාගල රත්නායක මහතා නෙදර්ලන්ත රජයෙන් කළ ඉල්ලීමකට අනුව මෙම පෞරාණික භාණ්ඩ නැවත ලංකාවට ලබා ලබාදීමට නෙදර්ලන්ත රජය එකඟතාවය පළ කර තිබේ.

මෙම පෞරාණික භාණ්ඩ ශ්‍රී ලංකාවට රැගෙන ආ පසු කොළඹ ජාතික කෞතුකාගාරයේ විශේෂ කුටියක තැන්පත් කරන අතර නෙදර්ලන්ත රජයේ අධීක්ෂණය යටතේ එම කුටිය මේ වන විට ඉදිකරමින් පවතී. ලංකාවට රැගෙන ආ පසු කෞතුක භාණ්ඩ වලට කාලගුණික සාධක වලින් හානියක් නොවන පරිදි අදාල කුටිය නිර්මාණය කිරීමට ජාතික කෞතුකාගාරය පියවර ගෙන ඇත.

මෙම විශේෂිත කුටියේ ඉදිකිරීම් මෙම සැප්තැම්බර් මාසය වන විට අවසන් කිරීමට අපේක්ෂා කරන අතර ඔක්තෝම්බර් මාසයේ මුල් සතියේ දී එම පුරාවස්තු මෙරටට රැගෙන ඒමට නියමිතව පවතී. රිදී, රත්‍රන් සහ මැණික් ඔබ්බවා ඇති ලෝකඩ කාලතුවක්කුව, ලී තුවක්කු කරත්තය,ඝන රන් මිටක් සහිත දියමන්ති 136ක් එබ්බ වූ රන් කොපුවක් සහිත කස්තානය,සියුම් කැටයම් ලී මිට සහිත තුවක්කු දෙකක්,යකඩ කඩුවක් සහ කොපුවක්,රන් ආලේපිත කුඩා තුවක්කු බටයක් සහ ලෝකඩ තුවක්කුවක් එම පෞරාණික භාණ්ඩ අතර වේ.