මේ තිදෙනාම රූ රැජිණ කිරුළ දිනූ සුරූපිනියන්ය. ශ්‍රීමාලි ෆොන්සේකා ගැන මුලින්ම ශ්‍රී ලංකාවේ බොහෝ දෙනා කතා කරන්නට පටන් ගත්තේ ආසියානු විවාහක රූ රැජින (2012) කිරුළ රටට ගෙන දීමත් සමගය. ශ්‍රී ලංකා විවාහක රූ රැජිණ ලෙස නාම යෝජනා වී ඇති ශ්‍රීමාලි මේ සූදානම් වන්නේ එළැඹෙන විසි වැනි දා චීනයේදී රටවල් එකසිය ගණනක සහභාගිත්වයෙන් පැවැත්වීමට නියමිත ලෝක විවාහක රූ-රැජිණ තරගය නියෝජනය කිරීමටය.

සුරූපී මොනාලි මේ සූදානම් වන්නේ 2013 ලෝක සංචාරක රූ රැජිණ තරගය සඳහා ශ්‍රී ලංකාව නියෝජනය කිරීමටය. ඇයට ඒ අවස්ථාව ලැබුණු හැටි පවසන්නේ මෙලෙසිනි.

මෙවර මිස් ශ්‍රී ලංකා තරගයේදී මිස් පර්සනැලිටි හෙවත්, පෞරුෂයෙන් හෙබි සම්මානය හිමිවුණේ මටයි. ඊට පෙර වාසනා දන්තනාරායන මහත්මිය යටතේ ඇති ආර් ඇන්ඞ් වී එන්ටර්ටේන්මන්ට් සංවිධානය කළ ලෝකයේ හොඳම නිරූපිකා තරගයට ඇතුළත්ව සිටියා. ඉන් පසුව දෙරණ වීව් පෞරුෂයෙන් හෙබි සම්මානය ලැබීමත් සමග 2013 ලෝක සංචාරක රූ රැජිණ සඳහා ශ්‍රී ලංකාව නියෝජනයට සුදුසුකම් ලැබුවා.

එසේ පවසන මොනාලි චීනයේ පැවැත්වෙන සංචාරක රූ රැුජිණ තරගයට පිටත්ව යාමට සූදානම් වෙද්දී ”ලස්සන කළු කෙල්ල” නමින් අද බොහෝ දෙනා අතර ප‍්‍රකට අනෙක් සුරූපිය කවුද කියා බලමු. ඇය නමින් සොලංගි ක‍්‍රිස්ටිනා ගුණවිජය වේ. ශ්‍රී ලංකා දැල්පන්දු සහ පැසිපන්දු ක්ෂේත‍්‍රයට ඇය අමුත්තියක නොවෙයි. ඒ අංශ දෙකෙන්ම ශ්‍රී ලංකාව නියෝජනය කිරීම ඊට හේතුවයි. අඩුම වයසින් ශ්‍රී ලංකාව නියෝජනය කළ දැල්පන්දු ක‍්‍රීඩිකාව ලෙස ප‍්‍රකටව සිටින සොලංගි, පසුගියදා පැවැති දෙරණ වීව් ශ්‍රී ලංකා රූ රැජිණ තරගයේදී - ශ්‍රී ලංකා රූ රැජිණ ලෙස කිරුළ දිනාගත්තාය. ක‍්‍රීඩා අංශයෙන් ජාතික කණ්ඩායම නියෝජනය කළ ක‍්‍රීඩිකාවක ලෙස රූ රැජිණ කිරුළ දිනාගත් එකම සුරූපිනිය ඇයයි. මෙවර ශ්‍රී ලංකා රූ රැජිණ වීමත් සමගම ඉදිරියේදී පැවැත්වෙන ලෝක මිහිකත රූ රැජිණ තරගය සහ ලෝක නිරූපිකා තරගය සඳහා ඇය ශ්‍රී ලංකා නියෝජනය ලැබ සිටින්නීය.

ලස්සන කළු කෙල්ල නමින් ක්ෂේත‍්‍රයේ ප‍්‍රකටව සිටින සොලංගිගේ පදිංචිය රුක්මල්ගමය. වයස අවුරුදු 22කි. උස අඩි 5යි අඟල් 10කි.
නුගේගොඩ ශාන්ත ජෝශප් බාලිකාවෙන් පාසල් අධ්‍යාපනය හදාරා ඇති සොලංගි කළමනාකරණ අංශයේ උසස් අධ්‍යාපනය ලබන අතර, ශ්‍රී ලංකා නාවික හමුදාව වෙනුවෙන් පැසිපන්දු කණ්ඩායම නියෝජනය කරන්නීය. එම අංශය මෙන්ම දැල්පන්දු අංශයෙන් ද ශ්‍රී ලංකාව නියෝජනය කළ ඇය අද පැසිපන්දු අංශයෙන් පමණක් ශ්‍රී ලංකාව නියෝජනය කරන්නීය. ඇයට සිටින්නේ, අම්මා-තාත්තා සහ නැගණිය පමණි. නැගණියද ඇයගේ අඩිපාරේ යමින් ශ්‍රී ලංකා යොවුන් දැල්පන්දු කණ්ඩායම නියෝජනය කරන්නීය.

සුරූපී මොනාලි දිසානායකගේ වයස අවුරුදු 23කි. සිරිමාවෝ බාලිකාවෙන් අධ්‍යාපනය ලද ඇයගේ ගම කඩවතය.

අම්මා - තාත්තා - අක්කා ඇයගේ පවුලේ උදවියයි. නැව් සමාගමක සේවය කරන මොනාලි වෛද්‍යවරියක වීමේ අරමුණ ඇතිව ජීව විද්‍යා අංශයෙන් උසස් පෙළට මුහුණ දුන්නාය. නමුත් පසු කලෙක ඇයගේ මිතුරියන් නිරූපණ ක්ෂේත‍්‍රය නියෝජනය කිරීමත් සමගම ඇයට ද එම ක්ෂේත‍්‍රය ගැන උනන්දුවක් ඇති වූ බව පවසන්නීය.

ලෝක විවාහක රූ රැජිණ තරගය නියෝජනය සඳහා අවස්ථාව ලබා සිටින සුරූපී ශ්‍රීමාලි ෆොන්සේකා පෝල් පෙන්ඩර්ස් නමින් ඇයගේම රූපලාවන්‍ය ආයතනයක් පවත්වාගෙන යන්නීය.

මෙවැනි තරග නියෝජනය කිරීම ගැන ඇය පවසන්නේ මෙලෙසිනි.

”සමහර විට ඉස්සර මෙවැනි තරග නියෝජනය කරන විට ලෝකයේ බොහෝ දෙනා හිතුවේ ශ්‍රී ලංකාව කියන්නෙ ඉන්දියාවේ කොටසක් කියලයි. සමහර රටවල් අදටත් හිතන්නෙ එහෙමයි. ඒත් පසුගිය කාලවලදී ශ්‍රී ලංකාව මෙවැනි ජාත්‍යන්තර තරගවලින් ජයග‍්‍රහණය කළ නිසා දැන් දැන් ශ්‍රී ලංකාව ගැන ලෝකයේ නොදන්නා අයත් දන්නවා. ඇත්තටම පුංචි වුණත් අපේ රට ස්වාධීන සුන්දර රාජ්‍යයක් කියන පණිවුඩය මට දෙන්න පුළුවන් නම්, අන්න එය තමයි මෙවැනි තරගවලට දායක වීමෙන් මට ඇති සතුට සහ අරමුණ.

ශ්‍රීමාලි එසේ ඇයගේ අරමුණ ගැන ප‍්‍රකාශ කරන විට මොනාලිගෙන් අපි ඇහුවෙ තරුණියන්ට මේ තැන සුන්දර තැනක් ද කියලයි.
”ඇත්තටම  ඕනෑම තැනක් සුන්දර කරගන්න පුළුවන් වෙන්නෙ අපි සුන්දරව හිටියොත් විතරයි. මේ ක්ෂේත‍්‍රයේදී හෝ වෙනත්  ඕනෑම තැනකදී අපි - අපේ සීමාව හඳුනාගන්න  ඕනෑ. මිනිස්සු බලාගෙන ඉන්නෙ කතා හදන්නයි. මොකද මිනිස්සුම හදාගත්ත මතයක් නිසයි. අන්න ඒ මතය වෙනස් කරන්න පුළුවන් වෙන්නෙ අපි හරියට හිටියොත් විතරයි.

ඇත්තටම මෙවැනි තරග අපේ රටට හොඳයි.

ඇත්තටම අද වන විට එය ඉතා හොඳ දෙයක්. මොකද අපි ලෝකයට ගිහින් ජය ගෙනාවොත් ඒ කීර්තිය රටටයි. මෙවර චීනයේ පැවැත්වෙන සංචාරක රූ රැජිණ තරගයට රටවල් 135ක් පමණ දායක වෙනවා. ඔක්තෝබර් 11 වැනිදා පැවැත්වෙන අවසන් තරගයේදී ශ්‍රී ලංකාවට ජයක් ගෙනදීම මගේ අරමුණයි. සංචාරක කර්මාන්තයේ දියුණුවට - ප‍්‍රවර්ධනයට එය තවත් ලොකු පියවරක් වේවි.

සොලංගි ද මේ ලද අවස්ථාව වෙතින් උපරිමය කර ලංකාවට කීර්තියක් ගෙන දීම අරමුණ බව පවසන්නීය. මෙලෙසින් ක‍්‍රීඩාවට මෙන්ම රූ රැජිණ වීමට ඇයට ඇයගේ උස සහ බුද්ධිමත් බව ඉවහල් වූ බව කියන සොලංගි, දිහා බලන සමහරු හිතන්නේ ඇය වෙනත් රටක තරුණියක යැයි කියාය. කෙසේ වෙතත් සොලංගිට මේ සියල්ලට අමතරව ගැයුමට ද හැකියාව ඇති බව කිව හැකිය.


”නෙත්යුග රන්තරු යුවළ තමයි
තොල්පෙති නාදළු වලට සමයි
මගෙ හද ඔබෙ සුව යහන තමයි
ඔබ සොයනා කළු කෙල්ල මමයි”

 


ගීතය වගේම තවත් බොහෝ ගීත සොලංගිට ලස්සනට ගයන්න පුළුවනි. මෙලෙසින් විවිධ වූ හැකියාවන් සමග දක්ෂතා පෙන්වන මේ සුරූපිනියන් තිදෙනා රූපයට පමණක් මුල්තැන් දී කටයුතු කරන අය නොවන වග සපථ කරයි. ජීවිතය සමනළියන් සේ සැහැල්ලූවෙන් ගත කිරීමට අකමැති වුවද, අරුත්බරව සරලව - සැහැල්ලූවෙන් ගතකිරීම අරමුණ බව ද සඳහන් කරයි. රූ සපුව සහ ඒ සිතිවිලි කර පින්නාගෙන ශ්‍රී ලංකාවට කීර්තිය ගෙනදීම වෙනුවෙන් ලෝකයේ පියඹා යන මේ තිදෙනාට ඒ කිරුළු රටට ගෙනෙන්නට අවකාශය ලැබේවායි අපි සුබ පතමු.


හැඩගැන්වීම්: ශ්‍රීමාලි ෆොන්සේකා (පෝල් පෙන්ඩර්ස්)