(වියලුව වාර්තාකරු)

බදුල්ල දිස්ත්‍රික්කයේ සොරණාතොට වැල්ලවත්ත ගම්වැසියනට එදිනෙදා කටයුතු මෙන්ම බෙහෙත් ටිකක් ගැනීමට නගරයට පැමිණීම සඳහා දැඩි දුෂ්කරතාවලට මුහුණ පෑමට සිදුව ඇතැයි ගම්වාසීහු පවසති.

ගොවිතැන් ජීවත්වන ගම්වාසීනට ගොවිතැනින් ලැබන දේ නගරයට කරමතින් රැගෙන ඒමට සිදුව ඇත.

පාසල් යන දරුවන් මෙන්ම රෝගීයකු රෝහලට රැගෙන එද්දී බදුලු ඔය තරණ කරමින් දැඩි දුෂ්කර මාර්ග ඔස්සේ ගමන් කිරීමට සිදුව තිබේ.

ඇතැම් අවස්ථාවලදී රෝගියා අතර මඟදී මිය යන බවද ගම්වාසිහු පවසති.

පාසල් දරුවන්ටද බදුලු ඔය තරණය කිරීමට සිදුවීම නිසා ඇතැම් දිනවල පාසල් නිල ඇඳුම් පවා තෙමාගෙන යෑමට සිදුව තිබේ.

පවුල් 30ක සාමාජිකයන් විශාල පිරිසක මෙම ගම්මානයේ ජීවත්වෙති. නිසි බලධාරියකුගේ අවධානය යොමු විය යුතු බව ද ගම්වාසීහු පවසා සිටිති.  මෙම ගමට තැපැල් කාර්යාලයක්, පෙර පාසලක්, හෝ ක්‍රීඩාපිටියක් නොමැති බව ද ගම්වාසීහු පවසති. බදුල්ල මහියංගන මාර්ගයේ බොරලියද්ද හන්දියේ සිට කිලෝ මීටර් අටක් දුරින් මෙම ගම්මානය පිහිටා ඇත.