(අංජුල මහික වීරරත්න)

ලංකාවේ විධායක ජනාධිපතිධූරය සම්පූර්ණයෙන්ම අහෝසි කරන්නේ නම් ඉදිරි  ජනාධිපතිවරණයට ඉදිරිපත් වීමේ අවශ්‍යතාවයක්  නැතැයි අග්‍රාමාත්‍ය රනිල් වික්‍රමසිංහ මහතා ප්‍රකාශ කළේය.

අග්‍රාමාත්‍ය රනිල් වික්‍රමසිංහ  මහතා මේ බව ප්‍රකාශ කළේ එක්සත් ජාතික පක්ෂ නියෝජ්‍ය නායක සජිත් ප්‍රේමදාස සහ කතානායක කරූ ජයසූරිය  මහත්වරුන් සමග අද පැවැති  සාකච්ඡාවේදීය.

එක්සත් ජාතික පක්ෂය  ප්‍රමුඛ පෙරමුණේ  ජනාධිපතිවරණ  අපේක්ෂකයා නම් කිරීම් සඳහා අවසන් එකඟතාවයක් ඇති කරගැනීම වෙනුවෙන් මෙම සාකච්ඡාව පැවැත්විණි.

විධායක  ජනාධිපතිධූරය සම්බන්ධයෙන් අග්‍රාමාත්‍ය රනිල් වික්‍රමසිංහ මහතා සිටින ස්ථාවරය අනුව ඉදිරි  ජනාධිපතිවරණයට එක්සත් ජාතික පක්ෂය  ප්‍රමුඛ පෙරමුණෙන් තරග කිරීමේ අවස්තාව නියෝජ්‍ය නායක සජිත් ප්‍රේමදාස මහතාට හිමි වෙන බවට ඉඟි පළ  වන්නේ යැයි එක්සත් ජාතික පක්ෂයේ ජ්‍යෙෂ්ඨ අමාත්‍යවරයෙක් පැවසීය.

විධායක ජනාධිපති ක්‍රමය  සම්බන්ධයෙන් පක්ෂයේ  ස්ථාවරය තීරණය කිරීම සඳහා එක්සත් ජාතික පක්ෂ සභාපති කබීර් හෂීම් සහ එක්සත් ජාතික පක්ෂ ජාතික සංවිධායක අමාත්‍ය නවීන් දිසානායක මහත්වරුන්ගේ මූලිකත්වයෙන් ඉදිරි පැය කීහිපයේ දී සාකච්ඡා වට කිහිපයක් පැවැත්වීමට නියමිතය.

පක්ෂ  මහලේකම් අමාත්‍ය අකිල විරාජ් කාරියවසම්, උප නායක රවී කරුණානායක සහ අමාත්‍ය මලික් සමරවික්‍රම යන මහත්වරුන්ද  ඉහත සාකච්ඡා  සඳහා  සහභාගිවීමට නියමිතය.