(සුජිත් හේවාජුලිගේ සහ  අංජුල මහික වීරරත්න )

විදුලි ගාස්තු වැඩි කළේ ඉංජිනේරුවන්ට බෝනස් දීමට නොවන බවවිදුලිබල හා බලශක්ති අමාත්‍ය කංචන විජේසේකර මහතා පාර්ලිමේන්තුවේදී අද (23) පැවසීය.

ඛනිජ තෙල් නීතිගත සංස්ථාවේද අතිකාල දීමනා කප්පාදු කිරීමට කටයුතු කරන බවද ඔහු  ප්‍රකාශ කළේය.

අමාත්‍යවරයා මෙසේ පැවසුවේ අත්‍යවශ්‍ය මහජන  සේවා  පනත යටතේ ගැසට් නිවේදනය පිළිබඳ විවාදයේදීය.

අමාත්‍ය කංචන විජේසේකර මහතා මෙසේද සඳහන් කළේය.

අවුරුද්දක් තිස්සේ තිබුණු විදුලි කප්පාදුව  නතර කළා. අපිට අමතර මුදල් සහනාධාර වශයෙන් දෙන්නෙ නැහැ. වියදමට සරිලන ආදායමක් ලබා ගත යුතුයි. ගාස්තු සංශෝධනය දුන්නට පස්සේ අපිට ණය ගන්න පුළුවන් වුණා. ප්‍රධාන බැංකු  අවශ්‍ය මුදල් ටික ලබා දුන්නා. ඒ අනුව දැවි තෙල් ටික මිලදී ගත්තා. මේ රටේ අඛණ්ඩව විදුලිය දෙන්න බැරිනම් සමහරු කැමතියි. ඉංජිනේරු සංගමය බෝනස් ඉල්ලනවා. අතිකාල දීමනා ඉල්ලනවා.එහෙම දුන්නෙ නැති වුණාම  පාරට බහිනවා  කියනවා. විදුලි බිල වැඩි කළේ ඉංජිනේරුවන්ට ප්‍රසාද දීමනා, වරප්‍රසාද දුන්න නොවෙයි. අපේ වියදම පියවා ගන්න. මණ්ඩලයේ පාඩුව ජනතාව මත පටවන්න බැහැ.