(ඩයනා උදයංගනී)

ජනතා කැමැත්තෙන් තොරව පස්සා දොරෙන් තනතුරට ආ වත්මන් නායකයා ජනතාවට යුක්තිය ඉටු කරනු ඇතැයි විශ්වාස කළ නොහැකි බව මැල්කම් කාදිනල් රංජිත් කොළඹ අගරදගුරුතුමෝ පැවසූහ.

මෙම අවස්ථාවේ දී පීඩාවට පත්ව සිටින ජනතාවගේ ප්‍රශ්නවලට විසඳුම් සෙවීම වෙනුවට රටේ සෙසු දේශපාලන නායකයන් ද එකිනෙකා ඇනකොටාගනිමින් බලය වෙනුවෙන් කටයුතු කරන බව කාදිනල්තුමෝ සඳහන් කළහ.

එබැවින් එළඹෙන නත්තල බොරු ආටෝපවලින් තොර ගවලෙනේ නත්තලක් බවට පත්කරගෙන දුගී දුප්පත් ජනතාවට උපකාර කරන්නැයි තමන් සියලු කිතුණු බැතිමතුන්ගෙන් සහ දේවස්ථානවලින් ඉල්ලීමක් කරන බව කාදිනල්තුමෝ කීහ.

මැල්කම් කාදිනල් රංජිත් කොළඹ අගරදගුරුතුමන් මේ බව පැවසුවේ බටපත්තල සාන්ත තෙරේසා දෙව් මැදුරේදී ඊයේ (16) පැවති ජුබිලි මංගල මහා දිව්‍ය යාගය වාර්ෂික මංගල්‍යයට එක්වෙමිනි.

2019 අප්‍රේල් 21 වැනිදා ප්‍රහාරයෙන් දිවි අහිමි වූවන්ට මෙතෙක් සාධාරණයක් ඉටුවී නැතැයි කී අගරදගුරුතුමෝ අපරාධ පරීක්‍ෂණ දෙපාර්තමේන්තුව, පොලීසිය, හා නීතිපති දෙපාර්තමේන්තුව කයිවාරු ගැසුවත් මේ සම්බන්ධයෙන් කිසිවක් කර නැතැයි ද පැවසූහ.

එම විනාශයෙන් පසු හිටපු ජනාධිපතිවරයා පත්කළ උසස් නිලධාරීන් තිදෙනකුගෙන් යුත් කමිටුව, වත්මන් ජනාධිපතිවරයා අගමැති ලෙස සිටියදී පත් කළ පාර්ලිමේන්තු තේරීම් කාරක සභාව මෙන්ම හිටපු ජනාධිපතිවරයා පත්කළ ජනාධිපති කොමිෂන් සභාවෙන් ආ නිර්දේශවලින් කිසිවක් ක්‍රියාත්මක වී නැතැයි කී මැල්කම් කාදිනල් රංජිත් කොළඹ අගරදගුරුතුමෝ දෙවියන් වහන්සේගේ විනිශ්චය ගැන විශ්වාසය තැබීම හැර කළ හැකි දෙයක් නැතැයි ද කීහ.